كيف تتعلم اللغة الإسبانية؟ اللغة الإسبانية واحدة من أسرع لغات العالم انتشاراً، ولو إنتِ كويسة في الإنكليزية فدا هيكون عامل مساعد كبير ليكِ عشان تتقني اللغة الاسبانية في وقت وجيز، خصوصاً إنها لغة مُمتعة وعلى قدر من السهولة بخلاف لغات تانية كتير. عشان تتقني الإسبانية فيه كذا خطوة لازم تتبعيها: 1) اتعلّمي من حد إسباني: أفضل طريقة تتعلمي بيها اللغة هو إنك تتعلّميها مع حد من أهلها، ويُستحسن لو كان الشخص الإسباني دا بيتعلّم لغتك الأم سواء عربي أو إنكليزي، عشان لما هو يغلط أدامك وهو بيتعلم تحسّي بارتياح إنتي كمان؛ إنك تغلطي ومتتكسفيش تجرّبي. كما إنك هتكوني مُجبَرة على إنك تفكّري وتتواصلي بالإسباني. 2) اجعلي الممارسة جزء من حياتك: وقت الجَد للجَد، لما تيجي تذاكري إسباني اقفلي كل المُلهيات حواليك، وركّزي في اللي بتعمله. تاني حاجة: من أكتر الحاجات اللي هتقوي الاسباني هي إنك تستخدميه في عمل حاجة بتحبّيها. يعني مثلاً، بتحبي الكتابة؟ خلاص اكتبي ولو paragraph قصير بالإسباني.. قصة.. مقال.. نصيحة.. أو حتى عيدي كتابة حاجة قريتها قبل كدا، أو ترجمي حاجة من لغتك للإسباني حتى لو بسيطة جداً. بتحبيي الموسيقى؟ احفظي أغنية إسبانية وغنّيها.. بتحبي القراية؟ اقرأي قصة قصيرة أو مقال بالإسباني .. وهكذا. 3) استعملي المتشابهات بين الإنكليزي والإسباني: هنفترض إنك عندك ولو معرفة مبدئية بالإنكليزية.. هيكون خبر حلو لما تعرفي إن 60% من الكلمات الإنكليزية من اللاتينية أصلاً. عشان كدا لما تقفي مع كلمة إسباني، خمّنيها.. أغلب الظن هتبقى كلمة إنكليزي ما.. وفي أسوأ السيناريوهات لو معرفتيش هتكوني جرّبتي واتعرفتي على كلمة بمعناها الصح. 4) اسمعي واتفرجي وشاركي: متكتفيش بإنك تتفرجي على أفلام ومسلسلات أو تسمعي أغاني ومحادثات وتسكتي على كدا.. اللغة مادة تفاعلية.. دوّني الكلمات والجمل الجديدة، وكرّريها وانطقيها واستخدميها تاني في مواقف مختلفة جديدة، ومتخلّيش معرفتك مُجرّدة من الممارسة. 5) زوّدي حصيلتك اللغوية: القراءة هي السرّ؛ فالقراءة هتساعدك تزوّدي حصيلتك اللغوية وتعرّفك بالتركيب اللغوي والقواعد والاستخدامات والتعبيرات الإسبانية. وأفضل حاجة تستخدميها هي قصص الأطفال أو المقالات الخاصة بالمبتدئين.. وفيه موقع اسمها خاص بالحكومة الإسبانية، هتلاقي فيه مقالات وأخبار كتير مكتوبة بالإسبانية. 6) اتعلّمي مبادئ وقواعد النطق: اللغة الإسبانية بتتنطق زي ما بتتكتب، عكس اللغة الفرنسية اللي اللغة المنطوقة مختلفة تماماً عن المكتوبة، أول ما هتعرف نطق الحروف والـstresses هتكون قطعتي نص الطريق. طبعاً دا هيجي بالمُمارسة وبالاستماع الكتير والمُكثّف. اقتراحات: حلو إنك تتعلّمي لغة جديدة، لكن الأحلى إنك تضيفي المرح والمتعة لعملية التعليم؛ لإنها مهما كان هتبقى صعبة في أحيان كتيرة، فاسعى إنك تتعلمي بأسلوب ترفيهي ومُسلّي وتفاعلي. - تم نشر هذه التدوينة في موقع ملحوظة: التدوينات المنشورة في مدونات هاف بوست لا تعبر عن وجهة نظر فريق تحرير الموقع.