ملحوظة: التدوينة بالعامية المصرية ردّ تفصيلي بخصوص نقدي لحلقة الدحيح عن.. ------------------ في الحلقة تم التركيز على التحدي بين كاسباروف وdeep blue عام 1997.. كاسباروف لعب ضد دييب بلو السنة اللي قبلها على طول 1996.. ومهم تعرف إن أول ماتش من الست ماتشات بينهم في تحدّي سنة 1996 فاز فيها deep blue!! (كاسباروف فاز بالنتيجة النهائية بمجموع الست مباريات).. يعني فوز المكنة في تحدي 1997 ما كانش مفاجئ ولا حاجة.. ده كان متوقع! لو رجعنا بالزمن لورا أكتر.. سنة 1957.. العالم Herbert A. Simon توقع إن الكمبيوتر هيقدر يكسب أفضل البشر في الشطرنج خلال 10 سنين!.. طبعاً ده ما حصلش غير بعد 40 سنة!.. لكن ده بيديك إشارة إن الموضوع كان متوقع، وهي مسألة وقت ليس إلا، وعلى حسب سرعة تطور شرائح المعالجة والذاكرة. والسبب في التوقع ده إن الشطرنج لعبة مش محتاجة غير ذكاء صناعي محدود Narrow Artificial intelligence. دييب بلو كسب كاسباروف بأسلوب اسمه Brute force وده ببساطة معناه تجريب كل الاحتمالات الممكنة مهما كانت غبية وما لهاش فايدة.. مفيش محاكاة لذكاء حقيقي هنا.. كل اللي محتاجه شرائح كمبيوتر أقوى عشان تجرب احتمالات أكتر! لو حابب تتكلم عن تطور الذكاء الاصطناعي يبقى تسيبك من الشطرنج وتركز على التحدي الأهم بمراحل بين Alpha Go لشركة deep mind التابعة لجوجل وبين بطل العالم في لعبة GO؛ لأنه في اللعبة دي ما ينفعش تستخدم أسلوب Brute force وده لأن عدد الاحتمالات في لعبة GO أكتر بكتير جداً جداً من قدرة أي أجهزة متاحة.. في الواقع أحياناً عدد الاحتمالات بيكون أكبر من عدد الذرات الموجودة في الكون! وعشان كده وعلى عكس الشطرنج.. العلماء ما كانوش متوقعين إن كمبيوتر ممكن يكسب بطل العالم في GO قبل 2025!.. بينما ده حصل في أول 2016!.. قبلها بعشر سنين!! وعشان كده المفروض كان تركيز الحلقة يكون على Go مش الشطرنج!.. هنرجع للنقطة دي بعدين. ------------------- في الفيديو اتقال شوية معلومات غريبة مش موجودة حتى في المصادر المرفقة بالحلقة! زي مثلاً موضوع إن كاسباروف كان بيطمّع ديب بلو وبيحط له "طُعم" عشان ياكله ولما ما كالوش كاسباروف استغرب وكده! يا جماعة إحنا بنتكلم على مباراة شطرنج في مستوى الـGrand Masters مش مباراة بينك وبين أخوك الصغير اللي هتضحك عليه وتطمعه عشان ياكل قطعة! الحركة اللي أربكت كاسباروف كانت رقم 37 في تاني ماتش.. ديب بلو حرّك الفيل بدل من الوزير في حركة شافها كاسباروف إبداعية وغريبة.. لكن ما كانش فيه "طُعم" ولا يحزنون! الغريب إن الدحيح حاطط لينك في المصادر بيقول إن الحركة دي كانت غلطة Bug في دييب بلو.. مع إنه ما قالش ده في الحلقة خالص! بالعكس قال إنه ذكاء استراتيجي من ديب بلو وتجنّب للفخ بتاع كاسباروف وضرب مثال مالوش أي معنى عن التفاحة اللي تاكلها بعد الأكل رغم إنك جعان! (ما فهمتش علاقة المثال بالموضوع سوى إنه شايف إنه بيكلم أطفال، ولا مفر من التبسيط المُخل بالمعنى!). - في الحلقة كمان قال إن كاسباروف بقى بيشُك إنه فيه تجسس على الغرفة بتاعته! وإن IBM بتستعين بلاعب محترف مع البرنامج.. مش عارف الكلام ده مصدره إيه الحقيقة ما شفتوش في المصادر بتاعة الحلقة ولا سمعته في حتة تانية! وبعدين هتتجسس على لاعب شطرنج في غرفته ليه يعني!.. هو مدرب كورة وعاوز تعرف خطة لعبه مثلاً؟!.. كل مباريات كاسباروف السابقة متاحة وفريق IBM كان بيدرسها فعلاً. في الواقع سبب المشاكل واتهام كاسباروف لـIBM إنها بتغش هي إنه طلب منهم أرشيف بمباريات ديب بلو السابقة كلها زي ما همّ عندهم أرشيف بمبارياته عشان يعرف يدرس خصمه كويس.. لكن IBM رفضت!.. فكاسباروف حس إنه فيه تلاعب بيحصل، وعلى الأساس ده اتهمهم بالتلاعب والغش.. IBM لاحقاً نشرت الأرشيف لكن بعد انتهاء المنافسة. ------------------ في الحلقة الدحيح قال: "الماتش ده فتح أبواب جهنم على البشرية.. أصل طالما غلب أحسن لاعبي شطرنج.. ليه ما يغلبش أحسن دكاترة.. ليه ما يغلبش أحسن مهندسين..". الكلام ده ساذج جداً وأفورة مالهاش داعي!.. وسببه نقطة ضعف كبيرة في محتوى الحلقة عموماً وهو عدم التفريق بين أنواع الذكاء الاصطناعي.. قلنا إن دييب بلو من أنواع الذكاء الاصطناعي المحدود Narrow Artificial Intelligence. دييب بلو اللي كسب كاسباروف في الشطرنج ما يقدرش يكسب أخوك الصغير في الكوتشينة!!.. وبالتالي استنتاج إمكانية استبدال الدكاترة والمهندسين بناء على مقدمة فوز الكمبيوتر في لعبة بقوانين محددة يسهل برمجتها زي الشطرنج هو استنتاج خاطئ. إنت عشان تقدر تستبدل حاجة زي الدكاترة والمحامين محتاج ذكاء اصطناعي عام General Artificial intelligence.. نظام ذكاء صناعي ممكن يستخدم في أي مجال.. وده ببساطة لأنه بيحاكي طريقة البشر في التعلم بأسلوب اسمه Reinforcement learning.. مش نظام بتحتاج تعدل في الكود بتاعة بين الماتشات زي دييب بلو! أنظمة تقدر تعلّم نفسها بنفسها.. وبالتالي تُستخدم استخدام عام.. وده اللي بتعمله جوجل من خلال شركتها Deep mind.. برنامج Alpha Go اللي هزم بطل العالم في اللعبة اتعلم لعبة GO بنفسه!.. مفيش حد كتب له ألجوريزم ولا برمج قوانين اللعبة جوّاه!.. في الواقع نفس البرنامج ده استخدمته جوجل في إدارة شبكة الكهرباء في مزارع سيرفراتها وقدر يوفر لهم 15% من استهلاك الطاقة.. وهو نفس البرنامج اللي بيستخدم في بعض الأبحاث الصحية في بريطانيا.. جوجل بتحاول تعمل نظام ذكاء اصطناعي عام وواضح إنها سابقة الكل وسابقة التوقعات حتى الآن!.. بس لسّه برضه ما وصلتش لمستوى العقل البشري والتوقعات معظمها بيتجه إلى إنه ده هيحصل خلال وقت ما في منتصف العقد القادم. (ملحوظة.. التوقع في مستوى الذكاء مش في الكفاءة.. العقل البشري بيستهلك طاقة أقل بكتير جداً جداً.. بالإضافة إلى إنه بيدير وظائف الجسم الحيوية.. وبيعالج العواطف وخلافه.. الكمبيوتر هيكون بيحاكي جزء المنطق والذاكرة والتعلم فقط!). من غير كلام عن أنواع الذكاء الاصطناعي والفرق بين المحدود والعام كل استنتاجات الحلقة اللي جت بعد كده مش مُرتبطة بالمقدمات!.. وأي حد مركز في المعلومات مش في النكت وهو بيتفرج على الفيديو لازم يستغرب. ------------------ في الحلقة بيقول: "قدرنا نعمل أجهزة اذكى مننا بمراحل". ده ببساطة مش صحيح حتى الآن! إلا إذا كنت بتعتبر الآلة الحاسبة أذكى منك؛ لأنها بتحل عمليات حسابية أصعب وأسرع من اللي انت تقدر تحلها! ----------------- نصيحة تعلم البرمجة وتخليك كسول - فاهم إنه بيسخر وبيتكلم عن الأوتوميشن - مش مفيدة قوي بعد الحديث عن الذكاء الاصطناعي اللي ممكن يثور علينا ويطالب بحقوقه! لأن ده معناه الوصول لمستوى الذكاء الاصطناعي الخارق Super Artificial Intelligence.. اللي حتى البرمجة مش هتنفعك فيه!.. البرمجة من أول المجالات اللي الذكاء الاصطناعي بيقدر يستبدل أجزاء كتير فيها... المبرمجين بيقطعوا عيشهم بإيديهم! مش أي برمجة هتنفعك.. البرمجة الخاصة بأنظمة الذكاء الاصطناعي ممكن.. وبلاش تتحمس لو كنت كسول فعلاً.. البرمجة مجال بيتغير بشكل دوري ومحتاج واحد مستعد لتعلم الجديد بشكل يومي! ---------------- دلوقت ممكن أحطّ شوية لينكات وأقول عليها المصادر بتاعتي حتى وإن كان فيها كلام عكس اللي قلته في البوست عشان أبقى "برنس" زي الدحيح.. صح! لينكات كتير مفتوحة قدامي على كروم.. مش هحطها! ----------------- ولو أردت التأكد من هذا الكلام اقرأ هذه التدوينة ( _ ) لواحد من أشهر المدونين عن الذكاء الاصطناعي ملحوظة: التدوينات المنشورة في مدونات هاف بوست لا تعبر عن وجهة نظر فريق تحرير الموقع.