الخميس اللي طاف الكويت وأهلها عن بكرة ابيهم كلهم بصوت واحد بدال لا يغنون النشيد الأسبوعي «هلا بالخميس».. كلهم غنوا «هلا في بوعزيز»، وطبعا انا اولهم، لأن فعلا هلا في بوعزيز وانجازات بوعزيز اللي تشرح القلب وتسر الخاطر وتخلي الواحد يقول جان زين عندنا اثنين من بوعزيز. الغالي بو عبدالعزيز طبعا انت اتعرف شنو مكانتك عندي واتعرف شنو انا اشوفك وشنو اتمنى، وصدقني اني وايد ترددت اني اكتب هالكلمتين لأني اعرفك عدل ما تحب اللي يمدح، بس اللي خلاني اصر اني اكتب انك اتعرف شنو ومنو روابي البناي؟ بس صدقني يا بوعزيز ان هالكلام اللي بتقراه الحين مو كلامي انا بس كلام كل اهل الكويت ومقيمينها اللي يقولون لك مشكور وعساها ما تكوبك، مشكور ونستنا عسا ربي يونسك ويسعدك دنيا وآخرة، مشكور لأنك كل يوم عن يوم تثبت لنا ان الكويت للحين فيها تجار اعيال تجار ما يستنفعون لأنك لا خذيت مناقصات ولا طلبت مليارات ولا استنفعت بترسيات.. وفوق هذا كله قاعد اتييب اليهده علشان تبرز الكويت واتخليها ترد عروس الخليج مثل ما كانت، مشكور لأنك تشتغل بسكات، مشكور لأنك اتحب الكويت علشان الكويت مو علشان شي ثاني، مشكور لأنك سويت لنا هالمجمع الشرح الونيس الأنيس اللي انرد راسنا فيه وانوايه ضيوفنا فيه، مشكور على برج الشايع اللي فيه هالفندق الأنيق اللي انعش العاصمة اللي اكل عليها الدهر واشرب ليمن عيز. محمد عبدالعزيز الشايع مشكور من اليوف بس مع المشكور ابي اطلب وان شاء الله اني امون عليك وما راح اتردني، طلبتك يا بو عبدالعزيز ان سمو الرئيس قالك اخذ المطار مردغه تمردغ خله يصير حجوه حق الأولى والتالي من حلاته ونزاكته لا ترده، ان سمو الرئيس قالك اخذ الترفيهية وعدلها واقلبها 6 Flags لا ترده، ان سمو الرئيس قالك ابيك تقلبلي جزرنا الجلحة الملحة اللي لا فايدة فيها ولا عايدة منتجعات ومنتزهات علشان الكويتيين يتبطحون ويتسبحون ويتسمرون عفية لا ترده، ان سمو الرئيس قالك ابي اشوف شوارعنا يطرد فيها الخيل من كبرها وتنظيمها وقوتها لا ترده، بالمختصر ان سمو الرئيس قالك ابيك اتسوي أي شي طلبتك لا ترده، لأنه هذا مو طلب سمو الرئيس هذا طلب الكويت واهلها كلهم من اصغيرهم ليمن كبيرهم؛ لأنهم فعلا يثقون فيك.. فعفية لا تردهم. روابي البناي