روابي البناي | السلام عليكم ورحمة الله تعالى وبركاته، اليوم بصبح عليكم بتصبيحة الإسلام واقول اصبحنا واصبح الملك لله، واصبحتم بنعم الله ولا حول ولا قوة الا بالله، واشهد ان لا إله الا الله وحسبي الله ونعم الوكيل، تدرون اخاف اصبح عليكم واقول صباح السعاده والحب والتفاؤل اصير هاشتاق بتويتر اني ادعو الى الجهر بالمعصية، والدعوة الى التلفظ بألفاظ تتنافى مع الشريعة الإسلامية، وتهيض المشاعر النائمة وتفيض الأحساسيس الراكدة، لأن مثلكم عارف ان بعض مدعي التدين سنافر الأمر بالمعروف والنهي عن المنكر وتوابعهم قفه، اللي ما عندهم لا شغله ولا مشغله غير التبحلق وتدخل عصهم اللي يبيله قص بكل شي ما يخصهم، قاعدين لنا قعده وناطرين اي شي بس علشان يتكلمون ويبربرون، لأنهم ملوا من الرباده والقعده اللي ما وراها غير تنتف شعر لحاياهم من الفراغ اللي اهم فيه، وتسوك اضروسهم اللي ما يفيد معاها لا سواك المدينة ولا غيره من الصفار والقطين اللي اهي فيه، والمصيبة والكارثة اللي اكبر اهي رضوخ حكومتنا الرشيدة لهم وتنفيذها لأوامرهم بكل شارده ووارده ليمن قوت شوكتهم وخلتهم ينفشون ريشهم ويتحكمون بخلق الله، وهذي بداية النهاية اللي عيزنا واحنا نقولها بس الجماعه الله يسامحهم معطينا احسينوه وعياله واذن من طين واذن من عيين. عاصمة اللات والعزى الاسبوع اللي طاف دعاة الإسلام حمروا العين علينا اللهم يا كافي وقرروا يعلنون حرب الردة علينا على اساس ان احنا اعداء الإسلام، وان احنا ما انعرف لا ربنا سبحانه وتعالى ولا رسوله ولا ندل جبلتنا، وعلى اساس ان اهم عندهم يقين ان بينه وبين الإسلام اشعره وايد اضعيفه وخفيفه وعلى طريف انها تنهار، علشان جذي اي شي راح يأثر فينه، واي شي راح يخلينا نرتد، واي شي راح يقلب راسنا ويخلينا انروكع له ونسجد له استغفر الله العظيم، فأطلقوا عبر حساباتهم في برنامج الطير المدلقم هاشتاق اسمه اصنام في الكويت، الصراحه اللي يشوف اسم الهاشتاق يخترع مثل حالتي اول ما شفته قلت: بسم الله الرحمن الرحيم اشصاير، وعقب بحث وتمحيص لقيت انه جماعة يزاك الله خير كانوا قاعدين ما عندهم لا شغله ولا مشغله حزة القايله ومساويكهم كانت منتهية الصلاحية، فقرروا يسوون اكشن اشوي فدوروا ما لقوا الا خنت حيلي واحد قاط ما وراه ودونه ويايب له طابعه تشتغل بنظام ثلاثي الأبعاد اتسوي مجسمات تذكارية حق اللي وده يهدي احد عزيز عليه او حق اللي وده يسوي شي مميز له ولعائلته وربعه، المهم شي جدا حلو وونيس، فقاموا من مكانهم وقطوا مساويكهم وتلوا دشاديشهم وقاموا يكبرون من قمة راسهم الله اكبر الله اكبر الأصنام تغزو الكويت، الله اكبر الله اكبر الدين على شفا حفرة، الله اكبر الله اكبر النار وبئس المصير، يعني لا خلوا ولا بقوا شي ما سووه ولا قالوه، وعلى طول دوزا حق مطاريشهم اللي ماسكين الحسابات السلبية بالطير المدلقم وعطوهم الليت الخضر انهم ينشرون ويسوون لويه في الطير المدلقم، ويقولون ان اكو محل يبيع اصنام بالكويت والناس ضرب المحشر عليه وعاد انتو اخذوا وشكوا من الجذب واليور اللي له اول بس ماله تالي، قالوا انه هالمجسمات خطرها عظيم واخطر من محلات بيع الخمور ولزوم على وزير التجارة واعضاء مجلس الأمة يتحركون بسرعه علشان يسكرون هالمحل اللي يسويها، لأن هالمجسمات خطرها راح يطلع بعدين عقب جم سنة، لأن راح يبدون اهل الكويت يتباركون فيها ويمسحونها وعقب يبدون يعبدونها. وتاليتها معاكم؟ انا بس ودي اعرف انتو من صجكم؟ انتو وتاليتها معاكم؟ لي متى بتستمرون بهالجهل والتخلف اللي انتو فيه؟ لي متى بتستمرون بلبس الأقنعة مالوتكم؟ لي متى بتمثلون دور البطولة في فيلم التستر بالدين اللي اهو بري منكم ومن فعايلكم؟ لي متى ما تعرفون من الدين غير انه حلل لكم تتزوجون اربع على اساس انكم الفاروق بزمانه من عدلكم وسنعكم؟ لي متى وانتو ما عندكم لا شغله ولا مشغله غير تشبب النيران والفتنه حق اللي ما يمشي على هواكم ولا يطاوعكم واللي يوقف ضد مصالحكم؟ لي متى وانتو كبر يدي الله يرحمه وانتو ما تدرون شنهو الفرق بين السوره المدنية والسوره المكيه وفوق هذا امسوين روحكم ابو هريره بزمانه؟ لا يبا لحد اهني وتوقفون، ايه نعم توقفون اذا الحكومه امطاوعتكم وماشيه على هواكم وما تقول لكم لا بكل شي تبونه كيفها، بس احنا مو الحكومه، احنا اهل الكويت، احنا اصل السنع، احنا انحط صبعنا بعين اكبر واحد وانقول له انت غلط اذا كان غلط، تدرون ليش؟ لأن هذا اللي تربينا عليه من اهلنا اللى علمونه ان الدين سماحة، والدين حب والدين نظافة قلب والدين صفاء نية والدين اني ما اطالع واراقب غيري وانظر الزلة، والدين نصيحة مو ترهيب وتكفير، هذا اللي تعلمناه من اميرنا ربي يحفظه انه ما نرضى بالغلط وان نقول حق العوي انت عوي بويهه لأنه احنا على حق. الصراحة ما ني فاهمة شنهو موديلكم ولا شنهو مبتغاكم لما اتخبونه وتقلبون روس الأوادم وما بقى شي ما قلتوه ولا فتوى ما طلعتوها على مجسمات يمكن كف ايدكم اكبر منها، اللي يسمعكم ويشوف نفيخكم حسباله ان اكو تمثال بوذا بساحة الصفاة ولا اللات والعزى منسدحين يم الأبراج والأوادم يدورون حولهم، والله لو ان بو لهب موجود ويسمع كلامكم راح يغشى من الضحك على هالتفاهات اللي اتسوونها. وبعدين تعالوا قولوا لنا ياللي شادين حيلكم وتقولون اصنام بالكويت وحرام، وهذا خطر ويدعو الى الشرك وغيرها من الأمور اللي مالها داعي اشوفكم لما تسافرون اتصورون يم الأصنام والكشره شاقه حلوجكم شق، لما تروحون مصر وتصورون يم ابو الهول ما قلتوا حرام ولا شرك، ولما تروحون متاحف الشمع انتو وذركم وتوقفون بالدور من غير لا تفرون ولا تزون علشان اتصورون يم تمثال الرئيس الفلاني ولا اللاعب العلنتاني ما قلتوا حرام وهذا منكر؟ ولا ابوي ما يقدر الا على امي؟ فهمونا يعني اللي بره مو اصنام وحلال توقفون معاهم واتصورون واهني حرام؟ خيركم خيركم لأهله! نصيحة ابي اوجهها لمدعي الإسلام اذا كنتوا فعلا اتشوفون انكم دعاة للإسلام وان قلوبكم وايد امعورتكم على الدين اللي من وجهة نظركم انه وايد ركيك وضعيف بالكويت، لدرجة ان وجود محل يسوي مجسمات بتقنية علمية حديثة يأثر فينا ويخلينا نسجد لهم وانتبارك فيهم، انا اقول حطوا حيلكم بأهلكم تيمناً بوصية رسولنا الكريم محمد عليه افضل الصلاة والسلام، والذي قال بحديثه الشريف «خيركم خيركم لأهله»، يعني الخير اللي تبونه حقنه وخوفكم علينا وبوهتكم الطايره بكل شارده ووارده علشان اتقلقصون عمركم وتطلعون بفتوى ما دري من وين اتييبونها خلوها حق اهلكم، يعني لا تخلونهم يسافرون ويصورون مع تماثيل خوفا عليهم من الفتنة والردة، لا تخلونهم يروحون مطاعم فيها صور تماثيل خوفا عليهم من الشرك، يعني ركزوا بأهلكم يزاكم الله خير وخلونه عنكم لأنكم مو قدنا. وابي بس اقول لكم معلومة لأني متأكدة انكم ما تقرون ولا تسمعون الا اللي تبونه بالكويت اللي انتو تقولون عن تصوير كاميرا بتقنية ثلاثية الأبعاد شرك واصنام وخرابيط وبرابيط، المملكة العربية السعودية بلد الحرمين الشريفين راح تستضيف شهر نوفمبر وبالتحديد من 13 – 23 معرض كنوز الصين واللي يحتوي على شواهد واثار تحت رعاية كريمة من الأمير سلطان بن سلمان بن عبدالعزيز، يالله شوفوا الناس وين اوصلت وشوفوا انتو وين تبون اتوصلونا. ما قول غير اللهم لا تؤاخذنا بما فعل السفهاء منا. @rawabialqabas آخر الكلام: وايد اسألوني روابي ليش ما علقتي على اساءة قناة بلاعين البيزة على حضرة صاحب السمو امير البلاد الشيخ صباح الأحمد الجابر الصباح بأحد اللقاءات، ردي وايد بسيط واهو اني بحياتي امشي على نهج طويل العمر ربي يحفظه، وهو عدم الرد على اللي ما يسوون علشان ما اعطيهم قيمة وحجم.