ناشد أهالى شارع فتحى هنداوى بالصفطاوى بأرض اللواء التابعة لمحافظة الجيزة، المسئولين بالحى لإيجاد حل لمشكلة زيادة وانتشار القمامة التى تملأ الشوارع بالمنطقة، وتغطية البالوعات التى تهدد حياة الأسر والأطفال.وقال الحاج «خطاب عبداللاه»: «الشارع مليان قمامة وما فيش صناديق كافية والناس بترمى الزبالة فى الأرض، والحى مش بيعمل حاجة لينا خالص، مضيفًا أن الشوارع بقت كلها تلال قمامة والناس بتولع فى الزبالة دى بالليل عشان عاملة أزمة كبيرة لينا».ويتابع: «على الرغم من أننا قدمنا استغاثات كثيرة إلا أن المسئولين فى الحى ما اتحركوش خالص، موضحًا أن تراكم القمامة بالشارع أدى إلى انتشار الروائح الكريهة، والتى بدورها تتسبب فى انتشار الأمراض والأوبئة للسكان، وخاصة الأطفال والمرضى الذين لديهم أمراض صدرية».وقال الحاج «طاهر فتح الله» أحد سكان الشارع، «معظم البالوعات من غير غطاء، والبالوعة اللى عليها غطاء، الغطاء بتاعها متهالك وممكن أى حد يقع جواها ويموت خاصة الأطفال وضعاف النظر، ده غير أن الشارع متكسر ومش متسفلت كويس وفيه حفر كتير».وأضاف أن الأهالى اضطروا إلى وضع خشب وحجارة كبيرة الحجم على البالوعات دى عشان الناس تاخد بالها وما حدش يقع فيها أو تحصل له حاجة.ويتابع نناشد المسئولين بالمرور على شوارع المنطقة بأكملها، والعمل على حل المشكلات التى تواجه الأهالى والاهتمام بالمنطقة مثل باقى المناطق، ويا ريت ينزلوا ويشوفوا بعيونهم اللى إحنا عايشين فيه لأن ده حرام وما يرضيش ربنا.