يا شيخ جيتك من هواجيـسٍ رحاهـا تستديـر أسباب حلمٍ يـا إلهـي مـن عواقبـه إنجنـي يا شيخ تكفـى فسـره يومـك بتفسيـره خبيـر من روعته لا مهتني زادي و لا نومـي هنـي يا شيخ أنا ماني بكافـر يزبـن مشعـوذ حقيـر يا شيخ جيتك مسلـمٍ ويقـول يـا رب إهدنـي يا شيخ تدري ما يجي قبل رمضان إلا القصيـر و الموت ذيبٍ ما درى وين الرباع مـن الثنـي يا شيخ أنا عندي شدادٍ ميـر مـا عنـدي بعيـر ما ولِف قلبي عالشقى مير الشقى اللي ولِفنـي حلمت يا شيخ بعقالي طايـحٍ فـي وسـط بيـر و الناس حولي نوب تمسكني و نـوب تهدنـي و هجيت أبي الجيرة لقيت الضبع يا شيخ المجير و طحت بردى الثنتين يأنـي أكلـه وألا أكلنـي قلت أعطي الخبت قدمي مثل السروق المستدير وإذا جهينه عندها صدق الخبر صـرت جهنـي وكني زبنت ظلال نخلـه بأتفيـا مـن الهجيـر وليني بجذعٍ يقـل مـا غيـر مريـم هزنـي و شفت النبي يوسف بيده صواع مليانٍ شعيـر وفي رحل بنيامين ذيـب يقـول معكـم ودنـي وسبعة سنابل وسط حقل براس ضلع أكله طيـر وسنينها أربع طعش سبع عجاف مع سبعٍ سنـي وأصوات رجلين البشر للنمل يا الأمن البشيـر والهدهد يدور على بلقيـس مـن بيـن البنـي وكني حطبت السمر في صيفٍ وبرده زمهريـر وأخذت لي عودٍ مـن الحزمـه بشبـه شبنـي وشوي وليا أني تقل مجنون في أمـره خطيـر في ديرةٍ وصفـي هواهـا كـان عـجٍ سمنـي ديرة بها ريش النعام يجّرح فـراش الحصيـر وسبعين جدرٍ ينهـدم مـن شـان جـدرٍ ينبنـي والله يجيرك شفت رزقي مثـل بستـانٍ كبيـر في مغرسه طيب ولا أدري ليه ما طاب الجنـي والطيب ذنبٍ ما بعـد عذبـه بتأنيـب الضميـر والخبث شاعر كل عذراء جاته تقـول أهجنـي والشعر دجالٍ ينادي يـا فـرزدق يـا جريـر غنـوا معـي يـا مـن هـواه أعـزه وأذلنـي والعين طرقي تخنقه عبـره ويضنيـه المسيـر والصدر طفل من الغلا يشهق نشيـده موطنـي وأصغر عيالي يلفظ أنفاسه على علبـة عصيـر المشكلة يـا شيـخ قدامـي تقـل مـا همنـي وكن الغِنى فارس من الديباج وسلاحـه حريـر ما له عدو إلا الفقر كم جـاب قاصيـه الدنـي والفقر عودٍ له مـره مشلولـه وورعٍ ضريـر في أرذل العمر إن وقف قاصي شموخه منحني مير أفتني يا شيخ مين أفضل جـزاك الله خيـر ما أدري الغني وألا فقير الحال يا شيـخ أفتنـي هو الغني اللـي يزكـي بالسنـه مـره فقيـر وألا الفقير اللي قضـى عمـره زكـاةٍ للغنـي *الشاعر* *محمد الدحيمي الشهري* يا اللي حلمت الحلم حلمك لا بشيـر ولا نذيـر الله يعينك من عظـم مـا قلـت هزيـت ابدنـي السالفه صعبه وحلمك صعـب والعاقـل يحيـر إحترت بأيش أفتيك ما عرف ميسري من ميمني لكن ما دام إخترتني وقت الشدايـد لـك شويـر أنـا لهـا والوقفـه اللـي للرجـال تهمني إسمع إن كان إنك لا شفت الدرب معها تستنيـر وتسمع لقولي ما هـو لينـي هرجـت تكبنـي ما دمت مؤمن عارف اليوم العبوس القمطريـر مهما تواجه من صعاب تعيش عمـرك مهتنـي ومهما تشوف الدرب عسره لا تهاب من العسير قل للعسيـر أرجـوك بعثرنـي و رد و لمنـي خلك لربعك في مرام الصعب يا الفارس سفيـر ترى الرجال تطيع بسيـف المحـدب والطنـي إنته تقول إنك زبنت الضبع في اليـوم الخطيـر وهـذا يـدل إنـك لقربـه يـا محمـد ممتنـي ومريت نخلة مريم اللي من عناء الرمضاء تجير وقالت زماني راح وأنا أعيش في غير أزمنـي وهذا يدل لعشق شمطا مـا لهـا ورعٍ صغيـر وأنته متيم في هواها جد وضعك محزنـي وشفت النبي يوسف وذي بشرى بخيرٍ لك كثيـر لكن لا تنسانـي أهمـك حيـل وإنـت تهمنـي أما السنابل مال يبغى يسرقـه سـارق خطيـر يـده تقـول لقلبـه المرضـان لا لا تمـدنـي وريش النعامه لؤلؤه في قاعة البحـر الغزيـر تشـد قلبـك لـو تشاهدهـا مثـل مـا تشدنـي والهدهد اللي طاوع سليمان وأسـرع بالمسيـر وحطة رحاله في سبأ يمشي عجل ما هو ونـي والشعر ديوان العرب راعيه له طـرفٍ بصيـر مات الفرزدق مع جرير ومات زيـد الحلزنـي من بعدهم فازوا بها شارون مـع تونـي بليـر تبدلـت غزلاتهـا بقـرود يـا الحـظ الـدنـي والعشق عز يصير وألا يـا لعلـه مـا يصيـر الله كـم فـي مهمـة الـدرب العسيـرة لفنـي أحيان نبعه يضمحـل وأحيـان يشبـه للغديـر مثل الحبيب أحيان يهجرنـي ونـوب يضمنـي وأبشر بعزك ما توخر عنك في اليـوم المريـر ما فيه شيٍ عن لزومـي يـا الدحيمـي يردنـي أنا زعيم القـوم لن فـزوا بعجـلات الضخيـر وتاريخي اللـي يمتدحنـي مـا خبرتـه ذمنـي أنا نصيرك كان ما حصلت فـي الدنيـا نصيـر أشفي غليلك من رقـاب القـوم وإنـت تعدنـي والصقر لا كسرت جناحينه ورفـرف للمطيـر يشره عليه البـوم ويقـول الظـروف تحدنـي والمرجله ما هي مصامخ قوم بالسيف الشطيـر كلٍ يقول لـذاك كـان إنـك شجـاع تضدنـي ولا صرت عارف جنة الفردوس وتعرف السعير عقلك يسـدك مثـل مـا عقلـي تـراه يسدنـي *الشاعر* *ناصر عليثه المحياوي الجهني*