بغض النظر عن أسباب وجود الكورونا وطرق انتشارها. الڤيروس المتعارف عليه حاليا بإسم COVID-19 أو الكورونا ، أحب أوضح أن كلمة كورونا هو اسم عائلة الڤيروس ، بمعنى مرض "سارس" من عدة سنوات هوّا برضو من عائلة ڤيروس كورونا . و الاسم كورونا أُطلِق عليه لأن جميع الڤيروسات من العائلة دي على شكل "تاج" تحت الميكروسكوب . أنا أحمد فريد من عمليات الفضاء بوكالة الفضاء الألمانية. المعلومات الطبية المذكورة في المقال دا هي اجتهادات بحث شخصية و من حق أي دكتور التعديلات و التصحيح لأني مش دكتور بشري و لكن علمي من علوم الفضاء. أولا أصدمك بحاجة مهمه جدا . جميع الڤيروسات الموجودة على سطح الكرة الأرضية ، هيا من الفضاء الخارجي. (صدمة صح؟ ) طبعا لازم نكون عارفين ان في فرق بين الڤيروسات و الميكروبات. لكن انا مش هخش في التفصيلة دي. أنا بس عليا دلوقتي أوضّح الصدمة اللي ذكرتها دي. تفسير العلماء لغاية دلوقتي أن بعدما تم تكوين الكرة الأرضية ، و مع اصطدام النيازك المساهمة في وجود حياة على الكرة الأرضية ، كانت محتوية على ڤيروسات و مع عملية التكوين و تطوّر الحياة، أصبحت الڤيروسات دي في تربة الأرض و انتقلت الى الحيوانات . و مع مرور سنين كتير (اوي) تأقلمت المناعة عند الحيوانات مع الڤيروسات دي و في نفس الوقت تعايشت و تكاثرت في أجساد الحيوانات دي ، و القصد من كلمة حيوانات هنا ، هوّا جميع الكائنات الحية عدا الإنسان. و بما أن الإنسان هوّا احدث الكائنات الحية علي الكرة الأرضية ، فهو عنده ضعف مناعة من الكائنات الحية لمعظم الڤيروسات دي. لأن الجهاز المناعي عند اي كائن حي بقوم بتطوير نفسه بنفسه عن طريق حرب مع الڤيروسات لوجود الجسيمات المضادة. لذلك معظم الڤيروسات تنتقل لجسم الإنسان عن طريق كائنات حية اخري. دي نظريات علمية مدروسة و حتى الدكتور العظيم (مصطفى محمود) الله يرحمه ذكر جزء من النظريات دي في حلقة من حلقاته. طيب الحماية من الفيروسات عامة و الكوڤيد خاصة هوّا عدم اختلاطه و اصطدامه بجهاز المناعة البشري ، ازاي؟ اغسل ايدك كويس و بتكرار و التباعد الإجتماعي . و دا لأن المصاب بالڤيروس بيحارب لوحده فقط مع الڤيروس. يإما جهاز المناعة يقضي على الڤيروس ، يإما الڤيروس يقضي على جهاز المناعة. و في الحالتين ينتهي الڤيروس عند الجسم دا . و دي فكرة التباعد الإجتماعي المتابعة. بغض النظر عن التأثير الاقتصادي او السياسي من الڤيروس دا. ازاي نتعامل مع الكورونا (الكوڤيد) في عمليات الفضاء؟ و ازي يتعامل رواد الفضاء مع الكارثة العالمية دي؟ احنا عندنا شروط و تحفظات قوية جدا و العقاب عليها كمان قوية ، لان في بعض الوظائف مش ممكن انها تقف او تاخد مهله و ترجع تاني ، و منها عمليات الفضاء. في داخل غرف التحكم يتم الابتعاد الحتمي عن بعضنا البعض. و يتم تسليم الدورية عن طريق التلفون الارضي الخاص بالعمليات و عدم الاختلاط نهائيا بين اتنين من نفس طاقم فريق العمل . و تعقيم جميع الأدوات المستخدمة من قبل الشخص تارك غرفة التحكم و تعقيمها مره تانيه من الشخص القادم للعمليات و تعقيمها مره تانيه و هوّا خارج. لأن أصابت واحد بس بالطريقة دي بتكون اخف من اصابة الفريق كامل ، لان دي ممكن تحدث كارثة حقيقة في عالم الفضاء. بالنسبة لرواد الفضاء الجاهزين للصعود بيتم اختباراتهم كليا و جزئيا و بعد اخر اختبار ، يتم عزل رائد الفضاء نهائيا عن اي اختلاط اجتماعي من اي شكل حتى صعوده لمركبة الفضاء. - أنا لا يهمني كم من الناس أرضيت .. ولكن يهمني أي نوع من الناس أقنعت.     -عباس محمود العقاد