يبه تصدق كنت أحلم وآنه صغير وانتظر بشوق ذاك اليوم اللي أرفع فيه راسك، وأشيل عنك جزءاً من أعباء الحياة، وأرد لك الجميل إنت وأمي الحنونة، ومهما عملت ما أقدر أوفيكم حقكم. ذكرياتي وياك وايد حلوة وآنه صغير كنت أضحك وياك وألعب، وكل مرة أشوف الصور أتذكر كل موقف مر علي فيه وياك. في البيت وفي السيارة وفي السفر وفي كل رحلة طلعت معاك مع أسرتنا وفي روحتنا حق المسجد. الله صج حلوة ذيك الأيام تعلمت منها وايد أشياء. علمتنا أبر بجدي وكنت آيود يده الله يرحمه كل أسبوع وآدخله المسجد وكان يعطيني كل مرة بيزات كانت تعني لي وايد أشياء. تعلمت شلون أساعد العود واحترمه، وشلون أكون بار بأمي وأبوي وأطلب رضاهم علشان الله يرضه عني. وما قصرت إنت وياي صرف علي وايد وتعبت، وكنت أشوفك تروح الشغل إنت وأمي وكنتوا تسهرون من أجل راحة عيالكم. أتذكر القصص الحلوة إلي كنت تقصها علي قبل النوم، واتذكر نصايحك الحلوة إلي ما زلت احتفظ بذكرياتها وأهمها إنك علمتني إني أكون قدوة في الحياة وأراقب ربي في كل أموري وأبصم بصمة خير علشان يتذكرني الناس وأحصل على أجر من ربي. وأغاني لول إلى كنا نغنيها مع بعض وكل ما سمعتها تذكرت حلو ذيك الأيام وبساطتها وحبنا حق بعض. مهما قلت ما أقدر أسرد كل شي لأن الذكريات أطول وأطول عن أبوي عيني إلي أشوف فيها وحياتي وباب الجنة الوسطي إلي أتعبد من خلاله ربي.اليوم يبه كبرت والحلم اللي حلمته تحقق، ويه الوقت إلي اعتمد فيه على نفسي وأتحمل المسؤولية وأساعدك في الحياة. والوعد إلي وعدتك إياه تحقق جزء منه. يه الدور علي علشان أرد لك ولو جزء من الجميل عشان أحقق الحلم إلي حلمناه مع بعض. وأهم شي يبه إني أواصل صداقتي معاك مهما كبرت. أكون لك صديق وقلب مفتوح أرد لك في كل شؤون حياتي. فإنت الخبرة إلي ما بيكررها الزمان لأنك مريت بتجارب وايد..لازم تكون لي سند في حياتي اليايية. في شغلي وزواجي وتعاملي مع كل الناس، وفي كل أموري في الحياة. يبه أحب أبوس جبهتك الغالية ويدك اللي تعبت وايد، وأحضن قلبك الطيب الحنون إلي كان يخاف علي يوم آنه صغير وما زال يخاف علي ويبي لي الخير. يبه وعد مني أكون بقربك إنت وأمي، وسامحني لأن في لحظة من اللحظات ما عطيتك حقك. باظل أحترمك وأخدمك وأكون الضحكة الحلوة اللي تنسيك هموم الحياة، واستفيد من كل لحظة علشان آبرك وأبر أمي الغالي. أبوي وسندي لا تنساني في دعواتك في كل صلواتك، فبركة حياتي برضاك علي ودعوتك الطيبة. آحبك وايد وربي يعطيك الصحة والعافية ويطول في عمرك ويبلغك فيني كل خير إنت وأمي الغالية.* ومضة أمل:لسان حال كل ابن يحب أن يرد الجميل لأبيه الذي كافح من أجل فلذات أكباده «وقل رب ارحمهما كما ربياني صغيراً».