علقت الفنانة مها نصار بطلة مسلسل الملك، على الهجوم الذي حدث على السوشيال ميديا على المسلسل «الملك» بطولة عمرو يوسف، معبرة عن حزنها الشديد من قرار إيقاف تصوير المسلسل لحين تشكيل لجنة عاجلة من مجموعة من المتخصصين في التاريخ والآثار وعلوم الاجتماع لمشاهدة المسلسل ومراجعة السيناريو كاملا وإبداء الرأي بموضوعية ومهنية حتى لو ترتب على ذلك عدم عرضه في موسم رمضان القادم. ونشرت «مها» عبر«فيسبوك» وكتبت: « كلام الناس فوق راسي من فوق سواء بالسلب أو بالإيجاب، حقك تقول اللي انت عايزه بس علشان أحترم كلامك لازم تكون بتتكلم صح وعن وعي ودا مبيتحققش غير بعد المشاهدة الجيدة للعمل..أنا حابة أوضح حاجة صغيرة إحنا بنعمل عمل درامي مستوحي من التاريخ وليس فيلما وثائقيا عن الملك أحمس والا كنا هنعمل اللي في التاريخ بالظبط». وأضافت: «الملك أحمس اتجوز أخته لأن في العصر ده كان جواز الإخوات عادي ونطلع نتكلم هيروغليفي.. لكن احنا بنعمل روايه اسمها كفاح طيبة للأديب العالمي نجيب محفوظ اللي قرأ الرواية هيفهم كلامي كويس.. الأديب كان ليه رؤية مختلفة من خياله ودكتور زاهي حواس في كلام سابق لما قرأ الرواية قال إنها مستوحاة من التاريخ وليست التاريخ.. فأنا مستغربة جدا كلام دكتور زاهي حواس دلوقتي». وتابعت: «مدام المخرج بيعمل رواية من خيال الكاتب ومستوحاة من التاريخ ودا طبعا مكتوب على المسلسل فمن حقه يبدع ليه نحصر الفن في دايرة ضيقة ونلف فيها كلنا!!! التزمنا بالرواية ودا بيحصل في العالم كله ومش جديد أنه يضيف شخصية جديدة يغير شكل الممثلين يموت شخصية يطلعنا بنطير هو حر.. ولو كنا صبرنا كنا هنلاقي الكلام دا على التتر.. الفن للمتعة والحكم دايما بيبقي فيه للجمهور اللي احنا بتشتغل علشانه». واختتمت: «واحنا جمهورنا واعي كفاية انه يغير القناة لو حاجة معجبتهوش .وأنا بتحدى أي حد إنه بعد عرض الحلقة الأولى بس.. هيحصله انبهار وتشوق ومتعة وهيكمل المسلسل للآخر وهيحترم المجهود الضخم الواضح من كل صناع العمل علشان تبقي ناقد وأحترم كلامك وافهمه لازم تكون بتكتب كلام محترم وهادف افهم منه فين أخطائي وأصلحها وتضيفلي شيء جديد، ودا مبيحصلش غير بعد مشاهدة العمل وفي الحاله دي بس لازم اسمعلك لانك هتضفلي شيء، أنا فخورة جدا اني اشتغلت في مسلسل الملك». مسلسل «الملك» قصة نجيب محفوظ، سيناريو وحوار خالد دياب وشيرين دياب، إخراج حسين المنباوي، وموسيقى خالد حماد، بطولة عمرو يوسف، صبا مبارك، ريم مصطفى وماجد المصري. يأتي ذلك بعد قرار المنتج تامر مرسي، إيقاف تصوير مسلسل «الملك»، الذي كان مقررًا عرضه ضمن المائدة الرمضانية الأسبوع المقبل، بعد سيل من الانتقادات التي نالت البرومو الرسمي للعمل كونه يتناول قصة «الملك أحمس»، عن رواية «كفاح طيبة» للأديب نجيب محفوظ، من بطولة عمرو يوسف، صبا مبارك، سوسن بدر، ماجد المصرى، محمد علاء، ريم مصطفى، محمد لطفي، أمير صلاح، وباسل الزارو، معتز هشام، وآخرين، وتأليف خالد وشيرين دياب، وإخراج حسين المنباوي.