كشفت الإعلامية والفنانة ريهام سعيد تفاصيل معاناتها مع فيروس كورونا، مؤكدة أنها غادرت المستشفى وعادت إلى منزلها، ولكن حالة الرئة لا زالت غير مستقرة وتحتاج لعلاج سيستمر أكثر من 20 يوما، وأكدت أن التغير الظاهر في وجهها من أثر الكرتيزون وليس عملية تجميل، ونصحت كل متابعيها بالحصول على اللقاح، كما وجهت الشكر لكل من تمنى لها الشفاء. وقالت ريهام سعيد فى بث مباشر عبر صفحتها الرسمية على موقع الفيس بوك: مش عايزة أقولكم مبسوطة قد إيه بكمية الدعوات اللى دعيتوها لى ومبسوطة قوى قوى إن أنا عييت ومبسوطة جدا إنى مريت بالتجربة دى وقد إيه حسيت إن فيه ناس خايفة عليا. تابعت: حسيت إن فيه ناس مش فارقة معاهم خالص وأكيد كان فيه ناس عجيبة جدا وأنا فى المستشفى وتعبانة ومش قادرة آخد نفسى والأكسجين بينزل وانت حاسس إن لو الأكسجين فضل ينزل هتتحط على التنفس الصناعى وهموت. وتحدثت ريهام سعيد عن أعراض كورونا التى أصابتها: صداع فظيع ودماغك بتدق جامد قوى وحرارة عالية جدا ومش عارف تتنفس وكلنا بنتنفس عادى ومش حاطين فى دماغنا إن دى نعمة رهيبة وأنا مش مصدقة إنى باخد النفس وأطلعه. وأوضحت أنها كانت تعانى أثناء إصابتها: مفيش حاجة تقدر تعملها غير إنك تبص على الموبايل تتسلى"، مشيرة إلى أنها ذهبت للكورسات التى تقدمها وتحدثت فيها لمدة 3 ساعات. وتحدثت ريهام سعيد عن مظهرها عقب إصابتها بكورونا، مشيرة إلى أن وزنها زاد وأنها تعانى من زيادة فى منطقة البطن: وشى ده كرتيزون مش فيلر وممكن بكرة أوريكم بطنى لو واحدة حامل فى التاسع مش هتكون كده وأنا مش زعلانة ومش متضايقة خالص ومبسوطة، واستمعت لبعض الشيوخ الذين أفتوا بأن الخارجين من كورونا يكونون مثل الطفل الذى ولدته أمه معندوش ذنوب ومعندوش أخطاء وبيبقى فى معية الله. وتابعت: حاسة شكلى متغير وحاسة إن قلبى متغير وحاسة إنى مش عايزة أغلط خالص عشان ربنا ميزعلش منى ولازم أختلس فرصة إنى أكون كفرت عن ذنوبى". ونصحت ريهام سعيد متابعيها بتناول اللقاح: مشكلتى مكانتش كورونا مشكلتى الرئة كان جزء كبير منها راح والتهب جدا وكان ممكن أدخل على تليف والحمد لله إن ربنا شفانى وعفانى وإنى رجعت لأولادى، ومعنديش أزمة فى حياتى غير كرشى وعندى أوردر فى المسلسل يوم الأحد وكان وزني 69 وأنا دلوقتى 77 كيلو ولسه الرئة مخفتش وهاخد كرتيزون 20 يوم. وسبق أن كشفت ريهام سعيد عن تعرضها لأزمة صحية جديدة، وأعلنت إصابتها بفيروس كورونا منذ ثلاثة اسابيع، وأكدت أنها محجوزة داخل المستشفى بعدما تسبب الفيروس في أضرار بالرئة، وأشارت إلى أن معاناتها من "مرض مميت" دفعتها لمحاسبة نفسها على أخطاء الماضي. ريهام نشرت صورة تظهر ذراعها فقط وبداخله الجهاز المخصص للحقن بالمحاليل وبطاقة التعريف بالمريض، وعلقت عبر حسابها بموقع الفيس بوك قائلة: بقالى أسبوعين بعانى من كورونا والحمد لله الرئة اتاثرت واتحجزت فى المستشفى من شوية.. إحساس غريب وانت عندك حاجه مميتة.. بتراجع نفسك كتير وتحاسب نفسك كتير.. أكيد غلطت لكن عمرى ما قصدت كان دائما الغرض نفع الغير وإظهار الحقيقة". وأضافت: "شكرا يا رب على حبك ليا وشكرا على ابتلائك.. إذا كانت دى النهاية يا رب أحسن خاتمتى واحسب لى كل عمل عملته لوجهك الكريم يا رب أنت الوحيد اللى عارف أنا عملت ايه وكانت نيتى دائما ايه.. استحملت وصبرت على افترا وظلم كتير". وتابعت ريهام سعيد: يا رب اغفر لى وسامحنى وخلى بالاك من أولادى.. إذا كان ده اختبار من اختباراتك ولسه فى العمر بقية يا رب اشفينى واقف جنبى وسهل عليا محنتى أنا راضية بأى شيء. واختتمت: نصيحة لكل واحد بيهاجم مشهور أو ناجح انت بتاخد ذنب رهيب انتوا بتاخذوا من أعصابنا وصحتنا وكله على باطل.. خلوا بالكوا الأذيه دى وحشة أوى وهاتقعد لك فى أعز ما عندك.. أرجو الدعاء بالخير ليا أيا كان هو إيه. لمشاهدة أجمل صور المشاهير زوروا أنستغرام سيدتي