سيف العرب بتــار لامسـهم كرب وضحكة حجاجه بس تامر وتنها - (الأمير د.سعود بن عبدالله) يمضي بنا محمد بعزم وجلاده للمجد ويسابق بنا بيض الأيام - (معالي سعود القحطاني) من هيبتك مملكتنا بك تشد الظهر الراس يقدح سطر والبشت ظلٍ ظليل - (عبدالله بن عبيان اليامي) الجزيرة - عبدالعزيز بن سعود المتعب: في هذا اليوم العزيز الغالي على أبناء المملكة العربية السعودية قاطبة، يُجَسِّد الشعر وهو موثق الولاء والوفاء واللحمة الوطنية ووحدة الصف والكلمة، تفرّد ولي العهد -على كل الأصعدة- سيدي الأمير محمد بن سلمان بن عبدالعزيز آل سعود -أطال الله عمره وأدام عزّه-، يقول الشاعر الأمير بدر بن عبدالمحسن: أنشهد إن بلادنا المملكة بلاد ما أعظم مكانتها وما أطول مداها يا محمدٍ حييّت يا نسل الأمجاد جمرة هل العوجا وشعلة ضياها يا محمد حييّت من روس الأشهاد بقولها وأفرح بردّت صداها حنّا نشوف الصبح من قبل ينقاد في مفرقك والشمس غضٍ سناها نحتاج لك روحٍ ونحتاجك فؤاد ونحتاجك أرضٍ يا معمرّ ثراها ويقول الشاعر الأمير د. سعود بن عبدالله: كفٍ تشيل طويق والشرق والغرب وتشيلها من شامها لآيمنها سيف العرب بتّار لامسّهم كرب وضحكة حجاجه بس تامر وتنها هذا الشجاع القاسي اللّين الذرب نوّخ ذلول المجد واحكم رسنها هذا محمد هو بقى بالحكي درب اللِّي المعالي بالمعالي قَرَنها هذا حفيد امعزِّي إن سولف العُرُب اللِّي خِلقْ للدار وأزهر زمنها يا دار ماريبه رَخاء وإنتخي حرب وأستأسدي به قلب الأرض ووطنها طرْ يا حمام العز سربٍ ورى سرب غن الديار وحدّثْ الناس عنها دامه محمد لاظمينا لنا شرب وش عاد هالدنيا وقولت وَهَنها ويقول الشاعر معالي سعود القحطاني: حرٍ على الدنيا على أول هداده والحر مثله يعجبك وين ماحام يمضي بنا محمد بعزم وجلاده للمجد ويسابق بنا بيض الأيام كنّه يقول لمن يبون انتقاده قدّام يا بيض المقادير قدّام يا وارث المُلك العظيم وعتاده وعرّاب رؤيا المملكة والتقدّام حنّا فتيل الحرب وأنتم زناده أقلط بنا وابشر بنا درع وحسام ومنها قوله: بك سطوة معزّي وبك من سداده عبدالعزيز الملهم الصارم الهام وكذلك قوله: الله عطا والله عليم بعباده كريم شعب المملكه وأنتم أكرام والله جمع لك بين ملك وعقاده وشعبٍ تحيزم فيك وأنت أطلق حزام فاخر ومثلك يفتخر في اجداده واحد بنى دوله وواحد فخريام جدّك معزّي فوق صهوة جواده أسّس كيان ومُلك في عدّة أعوام وراكان جدّك وأنت وارث شداده ومن مثل ابن حثلين فارس وهمّام خوالك الحثلين شيخه وساده بيت المفاخر والبطوله والإقدام وقوله: من المؤسس جاء على شكل إعاده نفس الفكر نفس الشكل نفس الأجسام ويقول الشاعر معالي تركي آل الشيخ: من مساري الليل لأطراف النجوم ومن ضحوك الفجر لين آخر مدار تبتسم لك يا محمد كل يوم أرضك وتنبت صياهدها خضار وتحت ظل الشمس والوضع امحسوم وفي السماء والأرض أو فوق البحار نكتب اسمك بالذهب فوق الغيوم ونكتب اسمك حب وأمجاد وشعار ويقول الشاعر عبدالله بن عبيان اليامي: وقت الشدايد يبين اللِّي يدوس الخطر ولا يهم العواصف ولو تحط وتشيل أنا أشهد إن مملكة سلمان فيها صقر أشقر حرارٍ ليا هدّه يجيب الجزيل يا طيب راسك يابو سلمان وانت الفخر يا فزعة الدار يا سيف الخليج الصقيل ومنها: يا عزوة اخوان نوره في نهار الظفر شبيه جدّك معزّي قاهر المستحيل ناديت يا مجمع النورين شمس وقمر وشفت الضيا من كفوفك يا محمد يسيل من هيبتك مملكتنا بك تشد الظهر الراس يقدح سطر والبشت ظلٍ ظليل ويقول الشاعر علي بن نايف الغامدي: يا سيدي رأيك اللِّي زاح الأوهام اليوم لك في الفضا صوله وجوله سيفك مجرّد وعزمك عزم ضرغام ورأيك مسدّد ونظراتك شموله بديت (بنيوم) يومن غيرك نيام وروّضت موج المحيطات المهوله وحّدت صف الجيوش بسيف الإمام وعدّلت راس العروبه عن ميوله وتقول الشاعرة (فتاة نجد): مستقبل الشعب السعودي وداره زاهر بإذن رب الخلايف ومضمون بجهود زيزوم الحُكم والإداره النادر اللِّي فوق مهما يقولون آمال شعب المملكة وافتخاره في رؤيته واقع ماهو قول وظنون والكلمه اللّي صدق أهلها مناره يقولها مثلي ثلاثين مليون محمد آمانٍ للوطن وانتصاره على جميع أعداه مهما يقولون محمد الحلم العظيم وقراره ناجح بفضل الله وبالعدل مقرون محمد طموحات الوطن واقتداره على النهوض وسيّدي للوطن عون