نشرت الفنانة نشوى مصطفى على صفحتها الشخصية على موقع التواصل الاجتماعي «فيس بوك»، تعليقًا تعبر من خلاله عن موقف تسبب في اشتباكها مع زوجها بعدما اتهمته بأنه من أضاع مفتاح القيادة الخاص بسيارتها، وأشارت إلى أن في النهاية أدركت أنها هي من أضاعت المفاتيح وليس زوجها، مشيرة إلى أنها وضعته في «الفريز» دون أن تنتبه، كما لفتت إلى أن زوجها سيدخل الجنة مباشرة واصفة ذاتها بـ«المريضة العقلية». وقالت «مصطفى»: «الحمد لله فرحانة إنى حاكون سبب إن جوزى يدخل الجنة، والله العظيم بيصعب عليا اللي يرتبط بفنانة أمه داعية عليه، لأن ربنا خلق لكل بني آدم جهاز عصبى واحد يكفيه الفترة الزمنية اللي بيعيشها، الفنان بقى من كتر الشخصيات اللى بيمثلها بيتقسم جهازه العصبى على الشخصيات دى، فيادوب بعد كام سنة الجهاز بيتعطل من كتر الاستهلاك لأنه مش بيكفى خدمة لكل الشخصيات اللي بنمثلها، فالنتيجة أن جوزى عايش مع واحدة جهازها العصبى متعطل، يعنى اللي ممكن يستحملنى دكتور أبوالعزايم أو بهمان». وتابعت: «الكلام ده بمناسبة إنى ضيعت مفاتيح عربيتى واتهمته إن هو اللي ضيعها، مع إنى آخر واحدة كنت خارجة بيها، بس الحمد لله بعد ما اتخانقت واتعصبت وأصريت أن هو اللي ضيعهم لقيناهم فين بقى، فى الفريزر، وأنا بحط الفراخ نسيت وحطتهم، المهم الحمد لله أنه حايروح الجنة من غير حساب لأنه كفّر عن كامل ذنوبه معايا، وأظن برضه المرضى العقليين اللي زينا بيدخلوا الجنة من غير حساب كويس يعنى وراه وراه».