روابي البناي | مساء رابع يوم من شهر الخير اللي يقول حق بدر النصر الله وربعه اخذوا كتر الله يعافيكم وخلونه انشوف الحياة بمنظور منفتح ومنشرح وايجابي، وخلوا عنكم الثلاث تمرات وربعها هالكلام ما يفيد معانا بهالشهر. اليوم سنابي راح يكون عن المشترى وتكود الاكل اللي ماله داعي، فمن يهل علينا المذيع بتلفزيون الكويت ويقول ثبت شرعا ان غدا غرة شهر رمضان المبارك، اتصير الذبحة عند الجمعيات وللحين السبب مجهول، العربانات متروسة عن بكرة ابيها، والناس مالهم خلق كل واحد نفسه بخشمه، خاصة اذا كانت هذه الزيارة في نهار رمضان فيا ويلك ياسواد ليلك لو قلت حق اللي جدامك لوسمحت شوي علشان اطوف، او طلبت من الحجية اللي معطيتك احسينوه وعياله انها توخر عربانتها اللي مخليتها مرتزه بالوسط، وقاعده تشوف ايهو انطع حق السحور مع البيض العيون الفول بالخلطة العادية ولا بالخلطة السرية، هذا غير الصراخ اللي يصير على التوست وخبز الصاج والرقاق فعادي جدا وانت واقف عند راعي الجبن الأبيض اتبولع بريجك وانت اتشوف الجبن الفرنسي منسدح جدامك ويمه الجبن التركي المعجف يخرعك صوت جهوري يقول «شلون ماكو توست ابيض»؟ الحين اشلون اسوي الدياي بجبن القلاص؟ وين مدير الجمعية؟ الصراحه بهاللحظة ما يكسر خاطري الا مدير الجمعية اللي راح يوايه الطناقر الكويتية اللي ما لقت توست ابيض لزوم الدياي المنقع بجبن القلاص. الصراحة ما اقول غير اللهم الطف بحريم الكويت بنهار رمضان، وثبتهم وحبب اليهم التوست الاسمر وتوست النخالة يارب العالمين.