أنتِ عندك جن عاشق!فتاة فى نهاية العشرينات من عمرها.. تمر بها سنة وراء وراء سنة ولم تتزوج.. وحتى عندما يتقدم لها شاب وتتم الخطوبة تفشل فى النهاية.. وتحتار ويحتار الأهل معها، لغاية لما تكلم صديقة لها لم يتحدثوا منذ فترة طويلة ويكون الحديث:الصديقة: أخبارك ايه.. وايه اللى بسمعه عنك ده؟!الفتاة: أنا الحمد لله كويسة.. بس بتسمعى ايه؟الصديقة: انك قربتى من التلاتين واتخطبتى كتير، لكن مفيش جواز، ومفيش موضوع بيكمل عندك للآخر، صح؟الفتاة: الحمد لله على كل شيء، فعلا.. وتتنهد فى حزن.. مفيش موضوع بيكمل عندى ومبقتش عارفة فى ايه.. تخيلى أن أحمد خطيبى كان بيحبنى لدرجة العشق بس مرة واحدة سابنى وده اللى قتلنى بجد، ووصلنى لدرجة الاكئتاب.الصديقة: والله أنتِ صعبتى عليا.. بس اطمنى حلك عندى يا هانم.الفتاة: وقد انفرجت أساريرها.. حل ايه قوليلى بسرعة؟الصديقة: فى شيخة فى منيا القمح -بلدة فى الشرقية إحدى محافظات مصر- بيمر عليها حالات كتير زيك.. ممكن نروحلها، واطمنى مبتاخدش فلوس، ومقولكيش بقى "سرها باتع".الفتاة: مش عارفة.. بس بقولك إيه يلا نروحلها يمكن يكون الحل عندها.وبعد يومين تأخذ الصديقة الفتاة ويذهبوا سويا لمنيا القمح، بعد أن اتحايلوا على أهلهم، وقالوا إنهم سيقضون يوما طويلا فى عملهم.وفى منيا القمح تصل الفتاة وصديقتها لمنزل الشيخة "الدجالة" ويكون الحديث:الصديقة: ازيك يا أم فتحى.. أنا جايبالك صاحبتى النهاردة وعارفة انك هتحلى مشكلتها يا حلالة العقد.الدجالة بصوت أجش: المكتوب مكتوب ومفيش منه هروب.. وتنظر للفتاة المسكينة نظرة مرعبة كى تلقى الخوف فى قلبها ولا تناقشها فى أى حديث لاحقا.الفتاة تنظر برعب لصديقتها التى أتت بها لهذا المنزل المخيف وكأنها تتوسل إليها أن يخرجوا من هذا المكان، ولكن فات الآوان.الصديقة للدجالة: صاحبتى قربت من التلاتين وبتتخطب كتير لكن كله بيفشل فى النهاية، مفيش موضوع ليها بيكمل، قوليلنا ليه يا ستنا.الدجالة بضحكة مخيفة: صاحبتك عندها جن عاشق.. مبيخليش جوازة تتم ليها ولا شغل، دايما جمبها، وبيعشقها من عشر سنين كمان.تنظر الفتاة المسكينة لصديقتها وقد عرق وجهها بشدة وازدادت رعبا، وتقول فى هلع للدجالة: والحل؟الدجالة: كل حاجة هتتحل.. المهم اننا نمشى الجن ده بالحسنى كدة، بس هو ليه طلبات هتتكلف مبلغ، أنتِ عارفة انى مباخدش فلوس، لكن طلبات الجن مش هسدها من جيبى.الفتاة: كم المبلغ اللى هنجيب بيه طلبات الجن؟الدجالة: عشر آلالاف جنيهالفتاة حزينة: طيب ولو معرفتش أدبر المبلغ ده؟الدجالة: هتفضلى كدة طول عمرك.وتخرج الفتاة وصديقتها حزانى من المنزل.. وقد زاد حزنهم بشدة.ده سيناريو بيحصل لبنات كتير فى مصر ومعظم البلدان العربية للاسف.. سيناريو بشع، فيه يتم استغلالهم والضحك على عقولهم بغيبيات لن ولم يشاهدوها، وللاسف نتيجة قلة العلم، وعدم الرغبة فى التفكير وترك أول أمر قرآنى وهو "أقرأ" واللى لو عملنا بيه تقريبا معظم مشاكلنا هتتحل بسهولة، يتم النصب عليهم بمبالغ مهولة وزرع أفكار خبيثة فى عقولهم.طيب خلينا نسأل الأول الأسئلة المهمة.. هو فى فعلا جن عاشق؟من وجهة نظر علماء النفس وعلماء الدين الحقيقين مفيش حاجة اسمها جن عاشق، والسبب ان الجن من مادة (النار) والإنسان من مادة أخرى وهي (الطين) فمينفعش يحصل تزواج بينهم أو عشق، يعنى مثلا القلم الجاف من مادة (البلاستيك) ينفع بقى أقولك أنتِ عندك قلم عاشق!، والكتاب من مادة (الورق) ينفع أقولك: أنتِ عندك كتاب عاشق!ومن زاوية أخرى لو جينا سألنا أنفسنا من هو أخطر الجن الشرير، هتكون الإجابة إبليس طبعا، طيب تعالوا كدة نشوف قوم أبليس، أو عشيرته بتقول عليه ايه فى القرآن:(وَأَنَّهُ كَانَ يَقُولُ سَفِيهُنَا عَلَى اللَّهِ شَطَطًا) (الجن - 4) شايفة عشيرته بيقولوا عليه (سفيهنا) بالبلدى كدة (الفاشل)، وده أخطر واحد فيهم والكبير بتاعهم وبيصفوه بالسفيه، وأنتِ للاسف بتعظمى منه، وفى اية تانية ربك بيقول:(إِنَّ عِبَادِي لَيْسَ لَكَ عَلَيْهِمْ سُلْطَانٌ إِلَّا مَنِ اتَّبَعَكَ مِنَ الْغَاوِينَ) (الحجر 42)يعنى لا ابليس ولا عشيرته ليهم سلطان ولا تحكم فى أى مخلوق.. إلا لو تركتى نفسك وعقلك ليه بقى.فآخر الجن مع الإنسان هو الوسوسة فقط زى القرآن ما قال، وأى كلام تانى يبقى ضحك على العقول، وعلشان تحمى نفسك كويس من شياطين الإنس والجن لازم تعرفى أن ليكى رب حامى وحافظ ليكى، ولو ظنك بيه خير استحالة الشر هيجيلك ابداااااا.. ده ربك بيقول:(أَنَا عِنْدَ ظَنِّ عَبْدِي بِي)، يلا بقى عدلى أفكارك وظنى خير بربك وهو هيكرمك آخر كرم بإذنه.ملحوظة وسؤال فى نفس الوقت:ليه الجن العاشق بيسيب ماريا شارابوفا، وكيم كاردشيان ويعشق فقط بنات مجتمعنا العربى؟!، هسيب الإجابة ليكم.