بما إني قاعده أكتب هذرتي الأسبوعية وأنا أشوف رائعة العمالقة عبدالحسين عبدالرضا وسعد الفرج، ورحمة الله عليه خالد النفيسي، اللي لو أشوفها على مدى أيام السنة ما أملها من حلالتها وخفة طينتها درب الزلق، راح أصبح عليكم بطريقة بوعدنان وأقول صباحكم خير يا مشمش طري مبلول، بداية أسبوع جميلة مثلكم شرحه مثل قلوبكم اتمناها لكم إن شاء الله. أتوقع أنتو بعد نفسي لو اتشوفون هالمسلسل ألف مرة ما راح اتملون، لأنه يذكرنا بالزمن الجميل لوطني الغالي، الزمن اللي فعلا كان عندنا إعلام كويتي محترم يشار له بالبنان، زمن إلى أبي وأمي مع التحية، زمن أنا رديت لعيونج، زمن حامي الديار، زمن الطيبين على قولتهم، زمن البساطة والعفوية والحبابة، زمن القلوب النظيفة اللي ما فيها جغاله ولا حقد ولا حسد، زمن اللي ييرانك يفرحون لك أكثر من اخوانك، باختصار الزمن الجميل اللي احمد ربي مليون مرة اني عاصرته وعشت فيه وخالطت ناسه. المشهد اللي قاعده اشوفه الحين، وعيوني امبحلقه، وحلجي مفتوح على مصراعيه من شدة الاندماج والكشره شاقه ويهي اهو مشهد بوصالح رحمة الله عليه العملاق خالد النفيسي، واهو ماخذ كتر يم ولده اصويلح الفنان القدير سمير القلاف، ربي يطول بعمره، وقاعد يتحسر ويقول «ايه الروس نامت والعصاعص قامت»، ويرد عليه اصويلح ببوزه الممقوط وعويناته اللي حاذفهم فوق، ويقول يبا ليش الروس نامت والعصاعص قامت؟ فيقول له بوصالح «اسال الروس ليش نامت؟». ماخش عليكم ترا سؤال اصويلح ولد بوصالح وايد خوش سؤال، اتهقون صج صج ليش الروس نامت والعصاعص قامت بالكويت؟ والعصاعص حق قرائي الحلوين ربع الماك جكن ومن الدول العربية اهي الأذناب.إنت عصعص عيل ابشر بالسعد! بوصالح رحمة الله عليه لما قعد يتحسر على عمره بالمسلسل بهذاك الوقت، ويقول الروس نامت والعصاعص قامت، كأنه يدري وواثق شنو راح يكون الوضع بعد جم سنة بوطن النهار، وكأنه يقول حطوا بالكم واصحوا ترا العصاعص اللي ما تشوفونها بالعين شيء راح تطول، واذا ما حشيتوها ونتفتوها راح تلف على أرقابكم وتاكل الخضر واليابس، وفعلا ما جذب رحمة الله عليه كلامه صج مليون بالإمية، والدليل على هالشي سياسة وضع اليد اللي تتبناها العصاعص اللي تسيدت وصار لها شنه ورنه بالكويت، وخير دليل على كلامي أن هالمثل صار شعار رسمي في بعض المؤسسات والوزارات والتعاملات الرسمية والسياسية والاجتماعية وحتى العائلية بالكويت، فعلشان اتمشى أمورك وتخلص شغلك لازم أنك تكون عصعص، واذا تبي تتوظف وتحقق طموحك، حتى لو كانت شهادتك طولك ما تفيدك، همن لازم اتكون عصعص، واذا تبي توصل ويكون لك شنه ورنه بالمجتمع وصوتك يوصل لازم اتكون عصعص. مو أي عصعص عصعص! ومن باب انشر تؤجر بس، حبيت اقول لكم انه مو كل عصعص عصعص، في عصاعص ينفرش تحت اريولها الزل الأحمر، وكلمتهم ما تتثنى هذا غير البيبان اللي ما تنصك في ويوهم لو شنو يبون، وفي عصاعص نص نص على حسب قوة ونوع العصعص، يعني العصعص الراهي هذا محد يقايشه ولا أحد يقول له ادن وراك، والعصعص المذوي هذا خنت حيلي يوم اتييله هبده على راسه، ويوم تلقاه شاتر على حسب المعزب اللي يقوده، علشان جذي تلقون ان وباء انتشار العصاعص بالكويت يختلف من مؤسسة لأخرى، ومن وزارة للثانية، ومن عايلة لعايلة، بس النتيجة وحدة واهي ان العصاعص وايد انتشارها ارتفع بوطني الغالي، واتوقع آن الأوان حق حشها من عرجها لأنها انتشارها هذا اهو واحد من أهم أسباب تدهور مستوى أداء وايد من الوزارات والهيئات الحكومية، اللي العصاعص داشين فيهم طول وطالعين عرض من كثر ما أهم يتحكمون فيهم. فللأسف واقولها وانا وايد ضايق خلقي، إن بعض وزارات ومؤسسات بلدي الغالي يديرها ويتحكم في مصيرها ومصير موظفينها اللي اهم اعيال التخ من المخ نماين ودره من هالعصاعص اللي الكرسي يترسهم مو اهم اللي يترسونها لأنهم ما يدرون وين الله قاطهم، وانا لما اقول ان العصاعص للأسف اهي اللي قاعد تدير الامور ما احدد ولا اخص امور معينة، لا ترا اقصد كل امور حياة المواطن الكويتي «المقرود»، يعني اموره السياسية والاقتصادية والسياسية والاجتماعية والعائلية، عاد انتوا اخذوا وشكوا شنو اللي راح اييكم من هالعصعص وخاصة اذا كان امذوي. اتهقون ليش؟ بس السؤال اللي يطرح نفسه وبقوه اتهقون ليش خنت حيلي الروس نامت؟ وليش هالعصاعص، اللي عساها الدقم اللي يدقمها ونفتك منها، ارتزت وصار لها شنه ورنه؟ تدرون ليش؟ لأن الروس اعيزت وطق ميخها ومالها خلق مداحر وقيل وقال مع العصاعص ومعازيبهم هذا غير التنازلات والتلفونات اللي اتييهم وتفرض على هالراس سو جذي ولا تسوي جذاك ولا راح تفتح عليك نار الله الموقده العياذ بالله منها ومن حرها، وانتوا يالطيبين سيد العارفين ان الروس مو متعودين على المذلة واخذ الاوامر وحاضر طال عمرك واللي تبيه يصير مثل هالعصعص، لأن هالراس عنده كرامه وتاريخ سواء سياسي واقتصادي واجتماعي وعائلي يلزمه انه ينعز نفسه عن المداحر مع العصاعص ومعازيبهم وما يرضاها على نفسه انه يصير مثل الياهل بالروضه اللي ابلته اتهاوشه اذا ما سمع الكلام ويسمع الجملة المعتاده «حط بالك ترا مثل ماحطيناك نشيلك»، وعقبها يبدي شان العصاعص بالترزز والتحكم بالبلد واهلها. علشان جذي المفروض ان احنا ما نستغرب ولا نستنكر لما انشوف بعض المناظر اللي اتخلي العين بقمة الراس، ولا نسمع بعض المصطلحات اللي مادري من أي قاموس، ولما اتشوفون وحده توه راشها النفط وما خلت ولا بقت شي مو لا بسته وتاكل التمرة بالشوكة والسكين لأنها اكيد راح تطلع وحده من اهل واحد من هالعصاعص، ولا تستغربون اذا شفتوا بزر ما طلع من البيضة ما ينزل من السيارة الا لما السايق اللي كبر ابوه يفتح له الباب وينزره ويتفلسف عليه هذا اكيد ولد واحد من العصاعص اللي توهم فاتحين له النل وامخلينه يترس مخابيه. تدرون ليش؟ من خبرتي المتواضعه وشوفتي حق الوضع العام بالكويت، أتوقع ان السبب الرئيسي بنومة اهل الكهف اللي نامينها الروس سببها الرئيسي عدم الرضا، لأن لا الشيخ راضي ولا الوزير راضي ولا العضو راضي ولا المواطن راضي ولا المقيم راضي وماكو شفافية والوضع صاير مثل سوق الصفافير واللعب حامي وحكومتنا الله يسلمها تتعامل معانا كأنها حكومة لدولة مؤقتة، ومجلسنا مجلس ضاعت أولوياته بعدما كانت قاعة لأرقى حوار لأرقى ديموقراطية في المنطقة، وكل هذا وشلون ما تبون العصاعص تقوم وتطول وتلشط، اقول تلحفوا وناموا علشان ما يحطونه العصاعص بسوق اليمعه ويقولون شعب جميل ذرب طيب ما يتكلم يحب الفرابتشينو وينهار على الترزز بالقهاوي والشحاطه والزمط الزايد بجم اقول. روابي البناي