"جسمي كله واجعنى يا دكتور.مفيش حتة فى عظمى مش بتوجعنى" شكوى متكررة من سيدات كتير ومع عمل الفحوصات تطلع كل الفحوصات سليمة.وتبدأ الحيرة فى التشخيص.وتعيش على المسكنات ومفيش فايدة أو حل.لكن التشخيص سهل.حضرتك عندك روماتيزم من نوع خاص.روماتيزم عصبي توتري أو فايبروميالجيا أيه حكاية الفايبروميالجيا؟ الحكاية إن بعض السيدات فى سن الشباب ومنتصف العمر عندهن مشكلة فى معالجة المخ لإشارات الألم.بمعنى إنه المخ حساسيته للألم بتبقى أزيد من الطبيعى.فمع التعرض لمشكلة نفسية أو عضوية تبدأ المريضة تحس بألم فى كل جسمها.ويبقى ألم مستمر ومزمن.ومش بس كدة.بيصاحب الألم ده اضطرابات فى النوم وإرهاق مزمن ومشاكل فى التركيز والذاكرة وقلق وتوتر وآلام فى القولون وعدم الشعور بالراحة وبيكون العلاج عن طريق تقليل الألم مع تمارين استرخاء وعلاج طبيعى والعلاج الدوائى ببعض الأدوية المضادة للقلق مع ادوية لتقليل اشارات الألم فى الأعصاب. لكن السؤال هل كل آلام الجسم تبقى فايبروميالجيا؟ فيه أسباب كثيرة لآلام الجسم.وأخطرها آلام العظام نتيجة أورام ثانوية من الكبد أو الثدى أو البروستاتا أو حتى أورام الدم زى مرض الميلوما الخبيثة واللى بتخترق العظام وتسبب آلام شديدة متفرقة فى الجسم كله. حاجة كمان تعمل آلام فى الجسم فى  كبار السن وهى مرض ألم العضلات الروماتيزمى Polymyalgia rheumatica والى بيكون فيها ألم شديد وتيبس فى الكتفين والرقبة والحوض وقد يصاحبها ارتفاع حرارة الجسم مع ارتفاع شديد فى تحليل سرعة الترسيب.وأحيانا بيصاحبها التهاب مناعى فى الأوعية الدموية يسبب ألم فى الفكين وصداع أعلى الفكين مع مشاكل فى الرؤية.وساعتها لابد من العلاج السريع وإلا يحدث فقدان بالبصر.ولحسن الحظ المرض ده بيستجيب بسرعة وبشدة للعلاج بالكورتيزون.