تخيل نفسك بتشتغل في شركة بترول وطلعان عينك في وسط الصحراء وعرفت أن حد من زملائك اتضرر نتيجة خطأ في السيفتي أو حادثة في العمل هتزعل طبعا وهتحاول تاخد بالك وتتجنب الخطأ الي وقع فيه لكن لو جالك حد من زمايلك  وانت مضايق او حتي حد غريب و فضل يشحن فيك و من الاخر يضرب علي الحديد و هو سخن و أنت مش طايق نفسك تفتكر أيه الي هيحصل و انت مضغوط  اصلا و روحك في مناخيرك يا هتروح تضرب كرسي في الكلوب وانت جايب اخرك و تتخانق او تروح ترمي استقالتك في وش مديرك عشان هي من الاخر خربانه خربانة طب لو علي النقيض بقاه انت جندي من أصحاب العزيمة القوية في كتيبة وبتحاربوا العدد هيحط قلبه تحت رجله لغاية ما يجيب حق بلده واصحابة الي ماتوا. طب ليه جبتلكم مثل الجندي عشان الطبيب النهارده مبقتش وظيفة بقاه دوره الكفاح ذيه ذي الجندي النهارده الاتنين بيكافحوا عشان يحافظوا علي حياه غيرهم وأمن وطنهم ومفيش تفرقة بينهم و الميت هنا و هناك في الحالتين نال شرف الشهاده، و رغم من اختلفت الاسباب و الموت واحد.. بس احنا هنا مش جايين نطبل احنا بنتكلم بالعقل و متخلوش صفحات السوشيال ميديا تنشر واحنا نشير ... طب هل معني كده اننا معندناش تقصير ! لا طبعا عندنا تقصير بدل المرة اتنين بس تعالوا نبص حوالينا كده احنا النهاردة و احنا بنتكلم علي مصر فتصنيفنا في الدول النامية من قديم الازل و حاليا بنعافر. وعشان نطلع من الدايرة دي. يعني لا بنتكلم علي أوروبا و لا امريكا طب تعالوا اقولكم أوروبا و امريكا و روسيا و ايطاليا فيها ايه ! تقريبا قصة نقص الموارد هي أزمة كل الدول المتقدمة قبل النامية بتتكلم عنها  ولا نسيتم فيديوهات الدكاتره الي لابسين اكياس الزباله في ايطاليا و اسبانيا و ممرضات نيويورك بسبب ازمة الملابس الواقية ... علي فكره كلامي مرفق بالصور مش هري و خلاص  لا و كمان بريطانيا الي عندها نقص حاد في أزمة الوفيات والملابس يا جماعة اذا امرت ان تطاع اؤمر بالمستطاع. احنا مش في ازمة احنا كنا في ازمة تفاقمت وبقت كارثة والكارثة هنا ليها ضحايا اطباء و ناس عادية احنا نعتبر في حرب واحنا دورنا نقف ندعم الناس الي بتجاهد عشانا مش ندوس علي تعبهم. عندنا مشاكل مش مشكلة واحدة ومشاكلنا مقارنة للعالم افضل من دول كتير اوي بس كارثتنا الحقيقية أننا في حالة حرب ايوا حرب حرب مع عدو بس المرة دي مرض بيبيد ناس وبيهدد دول واقتصادها.وانك بيتعافر عشان تقف علي رجلك لغاية النهارده ده فضل ونعمة من عند ربنا..غيرنا أكبر منا بكتير أوي وقع من أول اسبوعين و انهار. واحنا هنا في دولة  مواردها محدودة و رغم عن كده بتعافر عشان اقتصادها ميقعش و بتعافر عشان تقوم مستشفياتها  فا ان احنا بدل ما نقف كلنا جنب بعض عمالين نشير و ننزل اخبار استقالات بعضها وهمي وبعضها فعلي والندب والصوات شغال علي صفحات السوشيال ميديا ده حرام .دعم دكاترتك دعم جيشك الأبيض لان دول الي سهرانين عشان راحتك .... اقف جنب بلدك  و دكاترتك و دعمها وقدم لها حلول و انقد بايجابية بلاش تهد لان من الاخر بلدك واقفة  علي حيلها في الظروف دي ببركة ربنا . راعوا ان كل الي حوالين اطباء و اولادهم و زوجاتهم و ازواجهم واسرهم بلاش تبثوا الرعب في نفسيتهم. وتخلوهم وسيله ضغط علي ذويهم عشان خايفين عليهم ...فرقوا بين الام  الي بتخاف علي ولادها. و بين الدبة الي قتلت صاحبها عشان بتموت الدبانه الي علي وشة .. خليكم الايادي الي بتبني وتسند بلاش نهد. خلينا واقفين جنب بعض عصب واحد. تعدي من الازمة علي قلب رجل واحد. و بعدين نتكلم و نعترض ونحل.. بلاش نهد في جيشنا بدون قصد حافظوا عليهم و خلونا نساعد بعض نعدي من الأزمة.