روابي البناي| صباحكم خير يا قراء الخير، اليوم ما راح استرسل بالصباحات لأني وايد زعلانه منكم ومتكدر خاطري من تصرفات بعضنا اللي اتخلي الواحد غصب طيب يضيق خلقه، لأنها طالعة من اوادم المفروض انهم كويتيين، والمفروض انهم يحبون الكويت، والمفروض انهم يمثلونها ويشرفونها بالداخل والخارج، بس ما قول غير «ان حجيت حجيت عيبي وان سكت شقيت ييبي».قبل لا تبدون القراظ والتحلطم والتقرطم، ابي اقول اني عممت كلامي اليوم علينا كلنا واولكم انا، لأن سالفة اليوم تخص شيء المفروض ان اهو يعتبر حياتنا كلنا، والمفروض ان احنا كلنا مسؤولين عنه، وان اللي يمسه يمسنا كلنا، واللي يكدره يكدرنا كلنا، واللي يسيء له يسيء لنا كلنا، علشان جذي ومن غير مقدمات ولا تمهيدات بسألكم سؤال يقرقع في مخيخي وقلبي، وراح تطلع براسي انخله اذا ما جاوبتوني عليه، انتو اشفيكم؟ عسا ماشر؟ ليشجذي؟، ليش ما تحبونكم؟ ليش ما تحبون ديرتكم؟ او بمعنى اوضح واصرح ليش اتحبون ديرتكم بس بالكلام على قولة غلام درب الزلق؟ بس بالفعل ماكو شي؟ايه وانا صاجة انتو ما تحبونكم ولا تحبون الكويت، لأن اللي يشوفكم وانتو منهارين من البجي اذا سمعتوا اغنية وطنية يديده تتغنى بالكويت وحكامها واللي صار فيها من ظيم وظلايم، ابتداء من صداموه الله لا يرحمه واستكمالا ببعض الحناتيش والخفافيش اللي بلانه الله فيهم حاليا، واللي مثل المنشار لا يخلون ولا يبقون، هذا غير عبارة، خنت حيلي، يالكويت بعد قلبي يالكويت يا روحي يالكويت، مع الدموع والصوت المبحوح اللي يخلي اللي جدامكم يقول والله هالديرة محظوظة بهالشعب الفلة اللي ما مثله شعب بالدنيا، من كثر الشطة اذا الحكومة حبت تاخذ دور الهيس الأربد في شغلها وتتقاعس عن اداء واجبها وتطوير عروس الخليج اللي صارت ارملة من فعايلنا كلنا.أسمع كلامك يعجبني أشوف أفعالك أتعجب!اللي يشوف الانهيار الجماعي من الحس الوطني اللي حاش بني كويت الأسبوع اللي طاف واهم لا بسين الأعلام الكويتية ومعلقين الصور وغيرها من الحماس اللي ماله وصف، والوطنية اللي اتحسس الواحد انه لازم يحارب ولازم يجاهد، بس يحارب منو ويجاهد شنو مادري بس لازم يسوي هالشي، ما يقول انه هذيله نفسهم اللي انترست تليفوناتنه بصورهم ومقاطع فيديوهاتهم واهم يناقزون ويطقون ارقبه بالشوارع جنهم شواذي على دنابك وكواسير «عبدالزهرة وربعه»، فالمفروض انكم محتفلين ومستانسين ومسوين مسيرات وطنية وتحررتوا منهم فاشلون قاعدين اتشربكون وتترقصون على اغانيهم وكواسيرهم اشلون؟انزين خلونه من سالفة الترقص على الدنابك العراقية كيفكم، الوصخ والقذارة اللي خليتوه عقبكم بالشوارع سواء على شارع الخليج او بالشاليهات ليش؟ اشلون اتحبون الكويت واشلون اتوصخونها؟ ليش عقب ما بندتوا من ترشرش وتكتت المياهه على خلق الله وتقطط البالونات بويوه الاوادم، ليش ما هزيتوا طولكم وكلفتوا على نفسكم انكم اتنظفون عقبكم علشان نقول انكم فيكم الخير واتحبون هالأرض المسكينه؟ يعني الصراحه الانفصام اللي انتو فيه مادري اي نوع تطلعون والوطنية شايلتكم شيل والحماس طالع من مخيخكم والكويت والكويت، واخر المتمه اتخلون الجمل بما حمل من ازباله ووصاخه ومياهه ترجخ بالشوارع والسكيك واتروحون اتشخرون ببيوتكم بكل اريحيه ولا كأنكم امسوين شي.جان زين احد يقولي كمية الاستهتار والوصاخه، يعزكم الله، اللي اترست الشوارع عن بكرة ابيها شنهو تختلف عن المخلفات والزباله أيام الاحتلال كانوا يفترون بديرتنا الله لا يعيد الشر، بدون حسيب ولا رقيب، واللي ما تخلينا نشره عليهم لأنهم اصلا مو متعودين على النظافه ولا على السنع. فانتو يا شعب وطن النهار ياللي ينضرب فيكم المثل بالسنع والمنع والعدل والاناقه والاحترام، انتو اللي تشتطون اذا شفتوا واحد بايق ولا مختلس وتقولون حرام هذي فلوس الكويت هذا حلال الكويت، انتو اللي فجأة كلكم من باب انشر تؤجر من اتشوفون خلل في وزارة او مؤسسة او حتى في مدعاب سويتوله هاشتاق ونشرتوه، وطبعا هذا من باب خوفكم على ديرتكم ولأنكم رافعين شعار «من حبنا لها انهشتق لها»، انتو اللي اتسوون فيها جذي؟فللأمانة مقاطع الفيديو اللي اوصلتني للي يسمونه احتفالات العيد الوطني وعيد التحرير لوطن النهار، واللي اتخلي ناقص الربية يلقى ربيته ويعقل ويعين من الله خير، والمعاره اللي شفتها انا شخصيا بالمطار وانا راده يوم الاحد اللي من غير أي مقدمات خلتني اتذكر هوشات «بولاق الدكرور» اللي كانت اتصير بأفلام وحش الشاشه فريد شوقي الله يرحمه، ومستحيل انكم اتصدقون انه اللي كانوا مشتطين وماسكين الأعلام وعويناتهم امغورقه على الأغاني اللي تترنم بحب الكويت يسوون هاللون على قولة اهل البحرين، ويخلون القرعة ترعى عقب ما يخلصون من ردحهم على دنابك رعد وميثاق، ومستحيل انكم اتصدقون انه هالزباريق اللي طشروا خلق الله بجلنات الماي على اساس كثر ما يرش الحبيب ماي كثر ما يبين حبه حق الكويت، اهم نفسهم مكتظ فيهم المستوصف والمستشفى الخاص يوم الثلاثاء علشان ياخذون مرضية «بالأونطة»، وكاشتين بالدوامات ومعطلين شغل ومصالح خلق الله، وعقب ما يطلع او تطلع من المستوصف والمرضية بإيدها اتغني واتلوفح منهاره احنا عشقناها وعمار ياكويتنا.الشعب الزبرقاني!مو شي يديد لمن اقول ان احنا شعب ماله حل ولا طب، علشان جذي ابي اقول حق اللي ما يدري ليش الشعب الكويتي او الشعب الزبرقاني على قولة العزيزه (ام فاهد) والعزيز (بشار الشطي)  اييبون اليهده باحتفالاتهم الوطنية ويزيدون الجيلة حبتين وتلقونهم ما يخلون ولا يبقون بشت على علم الكويت ما يتلحفون فيه، ولا ماشه خضره وحمره وسوده ما يقززون فيها اكشيشهم، ولا احجاب بألوان علم الكويت ما يزنطون روحهم فيه، ولا حمره حمره ما يلوصون براطمهم فيها ولا كحل اسود ما يديفنون معالم عويناتهم فيه، ولا كيكه عليها كريمه حمره وخضره ما يشترونها، ولا منقوشة زعتر عليها طماطه وجبن ابيض وزيتون اسود ما يحطونها، كل هذا علشان لما يصورون في حجي سناب او بولد عمه الانستغرام واهم يردحون على هنا هنا اصبح المجد هنا، واللي تعطي انطباع ان الوطنية تعدت الامبير عندنا، طبعا مع مدة البوز ومعطينها جنب وحاطين فلتر تاج الورد اللي يخلي زينات صدقي الله يرحمها ويغفر لها اتصير شكيرا،وكل هذا بس علشان شيخوه وسبجوه يقولون امبيه شفتوا لطفوه وربع ديوانيتها شمسوين؟ حظي علينا واحنا وينه عنهم ليش الشيفه ما اعزمتنا؟ لازم انسوي يمعه اتحجي فيها الكويت كلها وننشرها على كبر الكويت، وان حصل الخليج والوطن العربي، وان اسمحت الفرصه انوصلها حق ترامب ومرته بس علشان يعرفون ان احنا وطنيين مو هينين.آخر الكلاموايد من اعيال وطن النهار اللي يحبونه بالفعل مو بس بالكلام متكدرين وضايقه اخلوقهم من المناظر اللي شافوها عقب ما يسمى باحتفالات العيد الوطني، لانهم يبنون وغيرهم يهدم، لأنهم يشرفون الكويت ويرفعون اسمها فوق وغيرهم بهزة جتف ولا بهوشة ولا بخزة يخرب اللي غيره قاعد يسويه ويبنيه، بس ماعليكم ترا الكويتيين الأصليين موجذي، هذيل اللي اتشوفونهم كلهم طقاق فوقاني مالهم شغل بالعروج اللي لو حجت حجايجها تلقونهم اول من يوقف ويشمر عن ذرعانه. باسمي واسمكم اتوجه بالشكر الجزيل لاخواني رجال الداخلية والاطفاء والاسعاف والدفاع المدني، اللي انحرموا من شوفة اعيالهم واهلهم وتحملوا مصاخة هذا وسفاهة هذيج بس علشان الكويت واهلها، شكرا لكم وربي يحفظكم انتو اللي فعلا تستاهلون ينقال عنكم الزباريق.