صباحكم خير يالربع، صباحكم شراحه ووناسه وكل شيء حلو مثلكم.. اليوم يامحفوظين السلامة بنوخر عن الغثا وعوار القلب وسوالف اشلون ردوا جنسية هذا واشلون حسنوا قذلة هذاك، ومنو البطل المغوار وغيرها وغيرها من السوالف اللي اتييب الحارج وضيقة الخلق، لأن بآخر المتمة محد فاهم شيء ولا احد يدري عن شيء، بس النتيجة الاساسية اللي نوصل لها ان الحياة حلوه وهذي الكويت صل على النبي اهي ديرتنا وفيها اللي نبي.. اللي خلاني اقرر اني ارد اهذر بنفس الموضوع اليوم اهو كثرة الطلبات اللي اوصلتني من ناس عزيزين علي وغالين على قلبي مثلكم وشرواكم، ملوا وطقت اجبودهم من المجاملات الباسجه الماصخه اللي ما يفيد معاها لا ملح الوزان ولا ابهارات سمراء عدن ولا حتى حرمل ملا بلال. عطسة قمشوه ومزامط مريموه! ولله الحمد والفضل والمنه، احنا كشعب كويتي عندنا عرف متوارث على مر الازمان، ان احنا اسم الله علينا شعب فريد من نوعه، وعندنا وايد اشياء اتخلينا «شعب الله المختار»، يعني مثل احنا الشعب الوحيد اللي على كوكب الارض نقدر انودي اللي مانبيه ورا الشمس، واحنا الشعب الوحيد على وجه الخليقه صاحب مقولة «ماتدري انا منو»؟، وغيرها من الاشياء الحصرية اللي تحسدنا عليها بقية شعوب العالم، علشان جذي احنا المجتمع الوحيد والأوحد اللي كل اسبوع عنده «هبَه يديده»، وعلى طول اهو IN عمره ما كان OUT الا في بعض الاشياء السطحية والغير مهمه مثل الرياضة، تطبيق القانون، وغيرها من الامور المو مهمه كلش ملش. ومن الامور المهمه اللي صار لها سنه واهي ساحنه اجبودنا وعاله اقلوبنا  «حفلات الغدا والعشا» اللي على الفاضي والمليان، واللي اتذكرني بلعبة الكراسي قبل، لأن هالحفلات تفتر على ربع قروب معين وتقتصر على اويوه معينه ما تتغير، لدرجة ان لو تسألون اللي يروحون هالحفلات عن اماكن تقجج ابرة الفيلر والبوتكس بويه افلانه ولا علنتانه راح اتسمع لكم عن ظهر الغيب وبكل همه ونشاط، مثل ما كانت توقف واتسمع نشيدة «وقف الأسير مقيدا» حق ابلة العربي الفلسطينية الله يذكرها بالخير. انا الصراحه طق ميخي وعيزت وانا ادور عن السبب اللي يخلي هالأوادم تستذبح وتشتط علشان يسوون مثل هالحفلات على مدار الشهر، وجان زين في مناسبة علشان يكون للحفلة نكهة وطعم لا على الفاضي والمليان، يعني لو ان «قمشوه» اعطست، لزوم مريموه اتقوم بالواجب واتسوي حفلة عشا علشان الناس يقولون حق قمشوه «ارحمج الله»، وطبعا مريموه لما اتقوم بالواجب اتييب اليهده، خاصة لما اتكون شاريه ساعه يديده ولا طخم يديد تبي تستعرض فيه علشان يكون لها السبق الحصري انها اول وحده البسته بالكويت، وطبعا مثل ما انتو عارفين يالغاليين عطسة قمشوه مو أي عطسة يعني الموضوع ما يقتصر على يمعه ونيسة وسوالف و «ارحمج الله قمشوه»، لا السالفه فيها دعوات وفيها برنامج حفل وفيها هدايا لازم انصورهم عدل وننشرهم على كافة ارجاء المعموره غير المطرب والمطربه اللي بغنون ارحمج الله ياقماشه واهي اترد عليهم يهدينا ويهديكم الله، وقمشوه متلوته بالبشت اللي يبرق وتلفح، ومريموه ماسكه لها السيف واتسمي وتستحيط عليها، انتو اشعبالكم هذي قمشوه اللي عاطسه يعني الموضوع كلش مو هين. طنبورة ويلاه يا ويلاه! وطبعا مثل ما قلت لكم قمشوه ما تصعد ولا تنزل عند مريموه ام طخم يديد، علشان جذي لما اعزمت النون وما يعلمون على حفلة عشا عطسة قمشوه، لازم اتييب اليهده، فقررت اتعيد امجاد امي عوده المهنا الله يرحمها، واتخلي المعازيم يردحون طنبورة على «ويلاه يا ويلاه»، وما يروحون ابيوتهم الا واهم امطلعين اللي فيهم كله، لأنها خنت حيلي وايد اتحب اتسوي خير وتخدم المجتمع، خاصة لما اتكون اهي «بكل مكان اطلعلك» على قولة المملوحة «بلقيس»، فلمدة اسبوع اذا مو اكثر راح تكون مريموه ام طخم وسيف حديث السناب والانستغرام واللايف عقب حفلة عطسة قمشوه وطبعا هذا اللي تبيه، وهذا المقصود من الحفله بالأساس. وما يمدينا نركد من حفلة عشا عطسة قمشوه الا واتيينا حفلة غدا  «سبيجه» واللي بتسويها علشان حبيبة قلبها «شريفه» صارت زينه من عقب الخرعه اللي خرعتها اياها «لطيفه» علشان البفاق اللي حاشها! وطبعا مثلكم عارف ان خرعة البفاق مو مثل العطسة يعني موشي هين، فبالتالي معيار الشحاطه يزيد، وكتلة الزمط راح تتعدى المعدل، عاد انتو اخذوا وشكوا جم عزيمه بالشهر من هالنمونه، وجم رد عزيمه والحسابه بتحسب، المصيبه موبالعزيمه ولا بسبب العزيمه، المصيبه الاكبر والادهى ان الموديل الحين ان صار اكو عزايم حق اللي يعتذرون! ايه والله عزيمه حق اللي ما اقدروا إييون العزيمه الاساسيه، يعني غصب طيب اتييون واتشوفون انا شنو لابسه وشنو حاطه واتصورون وتنشرون علشان الناس اتعرف انا عندي وانا اعرف فلانه وعلنتانه. الصراحه ما عندي اي تعليق اقوله غير الله يعينكم على عمركم، وربنا لا تؤاخذنا بما فعل السفهاء منا.  آخر الكلام:   ادري ربعي اللي يسوون هالحفلات بتاخذون على خاطركم مني بس انا امون عليكم وتدرون فيني انا ما اقدر ما اعلق ولا اقدر ما اقول عفيه خفوا علينا اشوي، ترا احنا مثلكم انحب الوناسه والطقطقه بس على سنع وبسبب وياحلاتها لما تكون ابساطه، يعني من غير تهول وتظهول وانشر ياكويتي. روابي البناي