يا هلا ومرحبا ومسهلا، اليوم انا مثل ما يقولون ما أغط السلطان في ملكه، لأن في مثل هذا اليوم قبل جم سنة، وماراح احدد عدد السنين، بس الأكيد انها من اسنين زمن الطيبين اللي يهبل ويطير العقل لأنه كل شي فيه اينن.. ما اخش عليكم شعوري اللي ماله وصف من الوناسه والأناسه وانا اكتب هذرتي اليوم، لأنه راح اتكون بين ايديكم وجدام عيونكم الحلوه بنفس يوم عيد ميلادي وعلشان جماعة الظواهر وربعهم ما يزعلون مني بنفس يوم ذكرى ميلادي المجيد، لأني محظوظه انكم راح تقولون بينكم وبين نفسكم كل سنه وانتي بخير روابي وهذا شيء وايد كبير عندي.. وبما اني منكم وفيكم وما اخش عليكم شيء راح افتن على نفسي اليوم حقكم واقول لكم شنو امنياتي بعيد ميلادي، لأن الواحد يحب دايما يشارك الناس اللي يحبهم ويموت عليهم امانيه وانا ماعندي اغلى منكم اقوله اللي اتمناه، بس لا تقولون روابي عن الطمع كل هذا؟ ردي راح يكون وايد بسيط  اشدعوه انتو كرما وانا، ان شاء الله، استاهل وبعدين الاماني بلاش خلوني اتمنى جود الله ورحمته بمرة ملك تتحقق اشوية من الامنيات.. My Wish List حق اللي راح يبدون يحركون براطمهم ويبون يبدون فقرة التحلطم علي، ابشركم واطمنكم واقول ترا امنياتي ما اتكلف، يعني ماراح تتضمن بيت على ثلاث شوارع في الضاحية وجدامه حديقة كبر حديقة جمال عبدالناصر يطرد فيها الخيل، ولا راح يكون فيها نغزه حق الغالي رئيس الحكومة بوصباح، علشان يعطيني وزارة من وزارات وطني الغالي اسرح وامرح فيها مثل ما ابي وعقب ما اشبع اتوعك صحيا فجأه واطلع لا سداد يسدني ولا رداد يردني ، وكلش ملش راح اتكون خالية تماما من دلاقمي اللي ادلقمها ساعات عليه ودايما يتلقاها بابتسامته المريحه، وطبعا عرفتوا منو العزيز الغالي بوعلي، باختصار حطوا في بطونكم كل البطيخ اللي بالعالم لأن امنياتي بسيطه وغير مكلفه، والحين بغمض عويناتي وبقول لكم امنياتي قبل لا انفخ على الشموع الوايد اللي راح تكون امزينه الكيكه. – يارب ينعاد علي هاليوم السنة اليايه واشوف تطبيق عادل للعداله الاجتماعية بين المواطن الكويتي البسيط والشيخ والتاجر. – يارب ينعاد علي هاليوم السنة الياية واشوف محاسبه ومحاكمه عادله بين اللي يبوق دينار واللي يبوق مليار. – يارب ينعاد علي هاليوم السنة الياية واشوف تطبيق فعلي لمبدأ «القانون على الجميع» مو على ناس وناس. – يارب ينعاد علي هاليوم السنة الياية وما يكون حق مستشارين «العازه» المعششين بالحكومة واللي مهمتهم بس تربيط العصاعص وتنفيع عمامهم ومعازيبهم وتياراتهم واخر همهم عمار البلد أي اثر. – يارب ينعاد علي هاليوم السنة الياية واشوف ممثلي امتنا الافاضل اللي اخترناهم ووصلناهم وخليناهم يكشخون بالبشوت ويتسمتون على الكرسي الاخضر يحافظون على القانون، مو البعض منهم يدوسون عليه من أجل قبيلة أو مذهب او حزب وتيار. – يارب ينعاد علي هاليوم السنة الياية واكحل عيوني بشوفة تنمية صجية مو بس «بالكلام» على قولة غلام درب الزلق، واللي تبدي بتقليل الاعتماد الكلي على النفط اللي الله يخليه لنا واللي لولاه جان «اعلوم». – يارب ينعاد علي هاليوم السنة الياية والقى اصحاب القرار ملتفتين حق اصحاب الكفاءة والخبرة والمميزين من ابناء هذا الشعب ومخلين عنهم المنافقين والمتسلقين واللي كل مالهم اييرونهم ورا. – يارب ينعاد علي هاليوم السنة الياية وما كو أي اثر حق نظرية من صادها عشى عياله بالكويت، واللي اشك انها تتحقق لأن مثلما يقولون «السالفة اشربت مروقها». – يارب ينعاد علي هاليوم السنة الياية وما انق الآلاف اللي انقها على مدرسة مزيان بنتي لأن راح ينقلب الهرم وراح يكون فيه تعليم ومخرجات تعليم محترم وعليه القيمة مثل ما يقولون مو تعليم قص ولزق. – يارب ينعاد علي هاليوم السنة الياية وما يكون لشعار «الكشخه الغلط» أي اثر عندنا، يعني مايكون أي وجود حق النماين اللي غصب طيب بيصرون كشخه، حتى لو كلفهم الامر التشرقد على كاشي المركزي بس المهم ان فلانه وعلانه شافوهم راكبين البنتلي ولابسين الفان كليف وشايلين الهيرميز على قولة الهيلق. – يارب ينعاد علي هاليوم السنة الياية وفقاقيع السوشيال ميديا وزبابيطها يكونون انبطوا وطاروا في الهوى شاشي، لأن الصراحه وجودهم وايد يسوي حارج، هذا غير التفاهات والسخافات اللي ينشرونها واللي للأسف انها توصلنا غصب طيب مو بكيفنا ولا مزاجنا. – يارب ينعاد علي هاليوم السنة الياية ودوابير بعض البنات في التبلي على اعيال الاوادم والتشهير فيهم علشان يلتفتون عليهم وياخذونهم تنتقل الى رحمة الله تعالى. – يارب ينعاد علي هاليوم السنة الياية ونفتك من فقرة ردح شارع محمد علي اللي يبدعون فيه بلاعين البيزه اللي عايشين دور وايد عود عليهم واهو دور انهم اعيال بطنها بمواقع التواصل الاجتماعي، واللي مجرد انك ما تختلف معاهم بالرأي او وجهة النظر يتجردون منه ويرد الفرع للأصل. – يارب ينعاد علي هاليوم السنة الياية واروح البلوكات وانا مرتاحه لأني ما راح اشوف الزحمه المليقه اللي مالها داعي غير الترزز والتشيحط ومع الخيل ياشقرا عند قهاوي الكورن فليكس والكريمة اللي على قلب الحب، على اساس انه احنا احفاد الرحبانيه وصماخنا ما يستوعب وعويناتنا ما تتبطل الا ليمن نرتشف قهوة الصباح والمساء. – يارب ينعاد علي هاليوم السنة الياية واشوف مزيان وابوها جمال قاعدين بأول سطر بحفلة راشد الماجد وعبدالمجيد عبد الله، لأن رابط حجز التذاكر ما تعطل ولا صار في خشمك اذنك بتوزيع التذاكر بس ان شاء الله ماينسون يحجزولي معاهم. – يارب ينعاد علي هاليوم السنة الياية واشوف ديرتي الغالية الكويت احسن واجمل بكل شيء. – يارب ينعاد علي هاليوم السنة الياية وانتو معاي لا فاقدين ولا مفقودين زايدين موناقصين، مستانسين مو امقلدمين، محققين كل امنياتكم لأني وايد احبكم.     آخر الكلام:   الاسبوع اللي فات كنت معزومه بعرس احدى العوايل الكويتية الكريمة اللي ربي يتمم عليهم افراحهم ويبارك لهم، الحوف اللي شفته والحب اللي لقيته من الناس اللي ما اعرفها خلتني احسد نفسي على اللي انا فيه، شكرا من القلب لكل الاخوات الفاضلات اللي صادفتهم واغمروني بحبهم وكلماتهم، وابيكم تتأكدون انه لولاكم وفضل رب العالمين ما وصلت روابي البناي لقلوبكم قبل اعقولكم.. شكرا لكم وايد وايد. روابي البناي