صبحكم الله بالخير يالغالين، وخطاكم السو عقب الطبعه والطفحه اللي صارت في ربوع وطني الغالي الاسبوع اللي فات، ومعوضين خير كل اللي تضرروا من هذي الطبعه، وان شاء الله كله بأجره، ادري انكم منهارين من التحلطم والتقرطم، ولكم حق والله، بس انتو اخذوا هالغرقه وهالطفحه بمنظور ايجابي متفائل، واللي اهو شعار حكومتنا الرشيده ومجلسنا، واهو ان هالطبعه والغرقه اللي صارت والاضرار اللي حاشتكم اهي تخفيف اذنوب وكرت fast track لدخول جنات الفردوس، ان شاء الله، لأنكم صابرين على الظيم والظلايم والتخنبق اليومي اللي صار مقرر يومي يشوفه المواطن الكويتي المسكين، من اول ما يقول اصبحنا واصبح الملك لله، وليمن يقول اللهم وجهت وجهي اليك وفوضت امري اليك، علشان جذي ابتسموا واخذوا هالطفحه من باب الايجابية وكلنا بصوت واحد لزوم نقول بصوت واحد: مشكورين يا حكومتنا ويامجلسنا  لأنكم توسعتوا بالتفكير بمستقبلنا ومصلحتنا لدرجة وصلتوا انكم شايلين همنا لما بعد حياة البرزخ وتبون تضمنون دخولنا الجنه. الصراحه مادري شقول بس وايد شكرا. أحد يعلمني هل كيف؟ ماراح اخش عليكم لأنكم مني وفيني، والسر ان شاء الله في جليب عندكم، انا من ليلة الطفحه وانا موانا، يعني احس ان ربيتي انقصت والسبه الصور اللي ما بين ثانيه وثانيه توصلني واللي تشرح وضع وطن النهار اثناء نزول امطار الخير من ربي، الصراحه للحظه حسيت اني مو بالكويت، وحسيت اني قاعده اشوف مقطع من فيلم اعجز اني اوصفه لأنه مايصير، وما تركب ولا ترهم ان مثل هالمناظر ومثل هالصور اتكون بدولة مثل الكويت، وانتو كلكم تدرون شنو الكويت؟ الكويت يعني دولة من أغنى دول العالم ولله الحمد، دولة صج انها اصغيرة بمساحتها بس اكبيرة باحتياطاتها النفطية وخيرها اللي يغطي عين الشمس، دولة تمتلك اول مؤسسة انمائية في الشرق الأوسط تقوم بالمساهمة في تحقيق الجهود الإنمائية للدول العربية والدول النامية، واللي يسمونه الصندوق الكويتي للتنمية الاقتصادية العربية، واللي يعطي قروض هيل من غير كيل علشان اتساعد الناس واتعلمهم اشلون يساعدون عمرهم، فهل كيف وكيفما يصير اتغرق وتطفح وتطبع بأقل من ساعة؟ اشلون ياجماعة احد يفهمني ويعلمني اذا عرفتوا السبب. يمكن بتقولون عادي روابي شنهو اليديد؟ هالطفحه صارت من قبل وعمك اصمخ ومثل ما حطيتيني لقيتيني، ليش مستغربه؟ ياجماعه ادري ان احنا صار عندنا مناعه وما قمنا نستغرب ولا نندهش ولا نندوش لما نسمع انه ناسين كلينكس وشوكة وسجين في بطن مريض  في المستشفى الفلاني، ولا سقف طايح وفاضخ راس طالب بالمدرسة الفلانية، وغيرها الكثير، بس سالفة الطفحه والغرقه الصراحه شئم وأي شيء، علشان جذي ذاك اليوم كنت ناطره ومتشفقه اني اكحل عيوني بشوفة ويه من اويوه اعضاء حكومتنا الرشيده يبشرنا ويقول ان الحكومه الحين مجتمعه اجتماع طارئ ومفعله خطة الطوارئ والازمات وعقبها يطلع لنا بيان واضح وشفاف موضح فيه منو المتسبب بهالمهزلة اللي صارت، وشنو الاجراءات الفورية السريعه اللي اتخذت بحقه، ونفس الشيء كنت اتمنى اتييني صورة واحد من الاعضاء الخمسين واهو امفسر اجمومه وامشمر عن ذرعانه ورايح يشوف ناخبينه اللي خلوه يلبس البشت ويتسمت على الكرسي الخضر، ويطلب همن اجتماع اسرع سريع مع ربعه النواب يخلون حكومتنا الرشيده تتخسبق وتقول ياويلك يالياي، بس للأسف ان احنا كشعب قبضنا من دبش، فالوضع اللي كان يوم الجمعه اللي فات ذكرني بأغنية «اقرع مقيرع طاح بالطاسة صيح على امه يبي قرقاشه»، والله العظيم الاغنية تمثل حالنا كشعب من عقب ما كان شعره امكتكت على ويه واشحلاته كثيف وطويل، بدا يحت ويطيح وما يفيد فيه لا زيت خروع ولا زيت زيتون ولا حنه فيها اقشور رمان ولا أي شيء، وفوق هذا كله اصحاب السلطة واللي بإييدهم القرار وتحديد مصير هالشعب المسكين ماسكين مقصاتهم ومكاينهم وطايحين له تقرع بشعورنا ليمن خلوا روسنا مثل الرقيه، وجان زين رقية مصرية حمره ناطعه لذيذه، لا والله رقية امصوفره امذويه خنت حيلي. شنهي الدبره؟ سؤال اتوجه فيه حق هرمي السلطتين التشريعية والتنفيذية يابوصباح ويابوعلي شنهي الدبره؟ شنهو الحل؟ هل اللي صار معناته ان الكويت مع كل خير يتفضل فيه ربي علينا راح اتغرق؟ هل يعني انكم راح تنمحون الانفاق من الكويت لأن مع كل مطره يغرق لنا نفق ففي 2007 غرق نفق الغزالي، و2017 غرق نفق الصباحه، وكل يوم انغرق احنا المواطنين في بحر الاهمال واللامبالاة والمحسوبية والفساد. فهل راح ترضون ان يوصل الفساد والمحسوبية والتنفيع والاسترخاص في جلب المقاولين بالتحكم بأرواحنا وترويعنا؟ ام انكم راح تضربون بيد من حديد وراح اتخلونه انحس، ولو لمره واحده، انه احنا عندكم خط احمر وما ترضون علينا؟ هل راح يتم الاعلان وتبشيرنا بأن اللي صار ما راح يطوف وراح يكون حساب المسؤولين حساب عسير، هل راح اتخلونه انسكت احلوج اللي يبربرون ويتطنزون علينا ويعرضون مساعدات علينا كشعب منكوب من المطر؟ هل راح اتصفرون بصفارتكم وتوقفون المباراة الحامية الوطيس واللي قاعدين يستذبحون فيها المسؤولين بتدربح الكره على بعضهم البعض علشان يحمون عمرهم ويطلعون من السالفه؟ ما ادري شنهي خطتكم ولا ادري شنهي رؤيتكم، بس اللي ادري عنه ان احنا وايد تعبنا وايد ملينا من كمية الفساد والتخنبق اللي صارت للأسف سمة من سمات معظم مؤسسات وطني الغالي وطن النهار، فهل راح اتطيبون خاطرنا واتييبون اليهده علشان اتريحونا؟ اتمنى من كل قلبي ان يصير شيء يشرح صدرنا ويسر خاطرنا قبل لا ينزل علينا غيث السماء مره ثانية والمسؤولين عن الطفحه الاولى ما لقوا لهم كبش فدا يشيل عنهم الجمل بما حمل.     آخر الكلام:   أكثر من 46 حكومة وأكثر من 700 وزير خلال 50 عام ووطن النهار الحر الابي الغالي مكانك راوح، موراضي يتحرك ولا يخطي أي خطوه.. لا تطور فكري ولا تقدم ثقافي ولا رؤية واضحة، هذا غير المؤامرات وجروبات الواتسابات وغيرها من السوالف اللي يشيب لها الراس واللي خلتنا ماشين على البركه وخلتنا انضيع ما بين حرامي وفاسد وسكانه مرته، واحنا كلما لنا انرد ورا. علشان جذي ودي احد يبرد قلبي ويقول لي متى؟ متى راح ايي الفرج ان شاء الله ترا والله العظيم عيزنا؟. روابي البناي