صباحكم خير يالربع، صباحكم شراحه ووناسه وكل شيء حلو مثلكم.. اليوم يامحفوظين السلامة بنوخر عن الغثا وعوار القلب وسوالف اشلون ردوا جنسية هذا واشلون حسنوا قذلة هذاك، ومنو البطل المغوار وغيرها وغيرها من السوالف اللي اتييب الحارج وضيقة الخلق، لأن بآخر المتمة محد فاهم شيء ولا احد يدري عن شيء، بس النتيجة الاساسية اللي نوصل لها ان الحياة حلوه وهذي الكويت صل على النبي اهي ديرتنا وفيها اللي نبي.. صباح الحب للجميع، صباح الراحة والشراحه اللي عساها ما تفارقكم،  صباح أسبوع جديد حلو ومتروس سعادة وانجازات لكم جميعا أحبائي. اليوم يا محفوظين السلامة راح اهذر للمرة المادري جم عن احد اهم الصروح الطبية في بلدي الحر الآبي، صرح المفروض انه تنعدم فيه الواسطه والمحسوبية، صرح المفروض يكون في كل شيء مضبوط وتقني، لأنه بهذا الصرح يتحدد مدى أهلية فلان وعلان، وبهذا الصرح وبشخطة قلم تقعد فلانه وعلانه في بيتهم وتاخذ معاشها كامل امكمل، لأنها ماخذه تقاعد طبي لأنه ظفرها يعورها، وطبعا هالظفر مو أي ظفر هالظفر وراه جم عضو وجم واسطه وجم حبة خشم وقطة اعقال، اكيد عرفتوا عن منو بتكلم اليوم.. ايه نعم اليوم بتكلم عن المجلس الطبي العام التابع لوزارة الصحة العامة، اللي للأسف اضطريت اني ازوره واكحل عيني بشوفة النماين اللي فيه بسبة ضرورة التصديق على اجازه مرضية أخذتها من مستشفى خاص، بسبة الوعكة الصحية التي يابتني ارض ارض من غير رحمة ولا شفقة، علشان جذي قمت مجبورة بزيارة غير مرحب فيها لهذا الصريح العريق.◗  حطيني لقيتيني! وانا بطريجي لهذا الصرح ما اقدر اوصف لكم الشعور اللي ياني really believe me I don’t know what to tell you، كنت متفائلة ومتأملة خير وبنفس الوقت خايفه وحاطه ايدي على قلبي، متفائلة لأني متوقعه اشوف وايد اشياء تطورت وتغيرت وتعدلت عقب اخر مره كتبت عن الخمال والفساد اللي ما تشيله بعارين بهذا المبنى العجيب، وطبعا التفاؤل ياني من وعود الوزير الإنسان اللي كان ماسك وزارة الصحة وقتها العزيز الغالي الدكتور هلال الساير، بس خنت حيلي ما مداه يسوي شيء لأنه مثل ما انتو خابرين اللي يبي يسوي ويبي ينجز ويبي يعدل في وطني الغالي ماله مكان على طول يبونه يستريح في بيته، وخايفه من ان احد ابطال شخصيات هذا الصرح اللي ذكرتهم بمقالي السابق يلجح اسمي ويوقف معاملتي ويعطلني، وانا بروحي مالي خلق ورايحه غصب، فكنت رايحه ريل ورا وريل جدام. وللأسف الشديد، ما خابت اظنوني وعلى قولة قيثارة الخليج ام حنين «انا على حطة ايديك»، لقيت المجلس الطبي على حطة ايديني من اخر مره زرتهم فيها، يعني لا فاد تنقز بالكلام ولا تحلطم ولا تقرطم لأن الجماعه امكبرين الجمجمه ومعطينيا حسينوه وعياله، وبمعنى اصح وادق ما عندهم وقت يلتفتون حق خمال المجلس الطبي وغيره، لأنهم مساكين يالله يوقعون معاملات السياحة الطبية الخارجية، فللأسف ان الوضع زاد والخمال كثر، للحين حشرة الاوادم، واسطوانة خشمك أذنك اهي اللي متسيده، وصراخ محمدين وحسنين شايل كأني قاعده بسوق الحراي، هذا غير بعض اعضاء مجلسنا الموقر اللي يمرون علينا واحنا قاعدين مثل الفشقه ويارين وراهم جيش عرمرم من حمالين الظروف الدعمه والأوراق اللي تبي تتوقع وتبي تستثنى وتبي تزيد نسبة عجزها وغيرها. علشان جذي انا حشمت روحي وقلت يا روابي عيني من الله خير وزهبي نوطج الوردي حق عمج كومار، علشان يخلص شغلج من غير لا عوار راس ولا هذره زايده، ومن باب تعميم الفايده وعمم تؤجر ترا النوط الوردي حق تصديق المرضيات بلمح البصر وبدون حتى كشف الطبيبه، والنوط الأزرق بوعشرين حق تجديم تاريخ موعد اللجان، واذا زادت الجيلة شوي من هاللون تزيد بعد نسبة العجز وايام المرضيات وغيرها من الخنبقه والمعاره اللي تصير بهذا الصرح العريق. ◗ وين Arab got Talent عنكم؟ طبعا اللي ينال شرف القعدة على كراسي المجلس الطبي راح يكتشف المهارات التمثيلية المذهلة اللي يتقنها بجداره بعض ابناء شعبي الغالي، وطبعا مو أي مهاره ولا أي ادوار، فالمناظر اللي القطتها بؤبؤة عيني وانا قاعده انطر عمي «كبير» يوقعلي اوراقي ويختمهم شي خيال ما له وصف، اهي تمثيليات تراجيدية كوميدية درامية، اهي افلام هندية عربية تجارية، شيء  ماله وصف أي عماد حمدي بزمانه أي عبدالفتاح القصري، أي شاروخان، فعلى طول قلت وين ثلاثي arab got talent الجميل عن هالطاقات المتفجره؟ فعادي وانا قاعده فجأه وبدون أي مقدمات يتحول الجحفل اللي قاعد جدامي واللي صار له ساعه يهذر بالتلفون ويتكعكع مع رفيجه مافيه الا العافيه، الى انسان فاقد للأهلية يهذر يحاذف عيونه فوق لأنه دوره وصل علشان يدش مع سكرتير احد نواب الامه اللي حالفين على حماية الامه والدفاع عنها على لجنة «الطب النفسي»، اللي راح تمنحه الكرت السحري اللي يخليه يعور بالدنيا عوره، وفوق هذا كله راح يتكي في بيتهم وياخذ معاشه كامل لأنه مينون وتعبان نفسيا وعنده كرت طب نفسي. تبون الصج احنا والله العظيم موصج، حتى الينون ماسلم منا. ◗ على وزن كيفي كويتي.. كيفي ميـــنون قبل كان اللي ربيته ناقصه او اللي ربي بلاه وعقله زر منه اهله يخششونه وما يحاولون يتكلمون عنه، ولا ما يخلونه يهايل بالشوارع ولا يأذي خلق الله، وطاري كرت الطب النفسي ما ينطرى عندهم، طبعا هذا قبل يعني فعل ماضي، لأن الحين اللي عنده الكرت السحري اللي يعتبر اغلى من كرت الأمريكان اكسبرس، لأن بهذا الكرت ينط على بيوت الأوادم ويكشف حرماتهم ومحد يكلمه لأنه وبهذا الكرت يتعدى على رجال الأمن ويكفخهم ويبكسهم ومحد يكلمه لأنه امخبل وعنده كرت، وبهذا الكرت يصرف الأدوية المسكنة والمخدرة واللي تحوي على نسبة عالية من المخدر على اساس انه هالشحط مريض ومينون ويحتاج دوا يسكن اعصابه، وعقب نلقى هالأدويه تنباع وتتوزع على اعيالنا بالمدارس والجامعات، وبهذا الكرت وايد ناس راحوا من جيس اهلهم وهالنصاب حاط ريل على ريل محد يقوله ادن وراك لأنه مينون ومايدري عن تصرفاته، وغيرها الكثير من الفعايل اللي اتشيب الراس. فللأسف ان هذا الكرت السحري اللي اموقع عليه ساتول من الدكاترة الفطاحلة اللي المفروض انهم قاسمين على كتاب الله سبحانه وتعالى انهم ما يسوون شيء مخالف ولا خارج عن القانون ولا يخالف ضميرهم، بس الظاهر ان هالدكاترة استندوا على فتوى سريعه خفيفه لطيفه طلعها لهم واحد من جمبازية المتسلقين بالدين، ومثل ما تدرون ان عند المصالح والواسطات الضمير والقسم ياخذ اجازه مفتوحة عند بعض الاوادم، منتشر بوطني الغالي بشكل كبير فنسبة حاملي هذا الكرت في بداية عام 2008 كانت %5، وطبعا هذي نسبة مو هينه، بس اكيد ومؤكد انها زادت الحين وبشكل رهيب ويخرع، خاصة اذا كان عندنا بعض النواب اللي يتسابقون لمساعدة الراغبين بالحصول على هالكرت السحري اللي يفتح لهم البيبان المسكره ويطلعهم من البلاوي الزرقا، فهذا الشيء ينذر بالخوف والخطر فسجلات الطب النفسي تزخر بأسماء العوائل الكويتية اللي يتمتع اعيالها وبناتها بهذا الكرت السحري بدون حق، بس علشان يغطون على بلاسة وشطانة اعيالهم.    آخر الكلام:   كلنا ندري ان الشعار المرفوع حاليا بوطن النهار اهو «يافرعون من فرعنك؟ قال ومنو اللي وقفني؟»، فعلى اساس ان هالفرعون افداوي ولا حمالي اجناط لاعب ابإييده وريوله لا سداد ولا رداد، بس صدقوني ترا هالفرعون بدا يدبي على البيوت ويخربها، وبدا يتطاول على هيبة الامن ويزعزعها، وبدا يدمر اعيالنا واعيالكم بالمخدرات والحبوب ويقططهم بالشوارع، والسبه كله ان هالفرعون عنده كرت سحري امخليه خارج نطاق التغطية ومحد يقدر يقوله ادن وراك، علشان جذي اتمنى من الاخ العزيز وزير الصحه المجتهد انه يشرف بنفسه على سجلات وملفات حمالين الكرت السحري، واللي يدشون على اللجان اللي تشخط بكل سهوله على منح هالكرت حق الاكو والماكو، لأنه الكويت واهلها يستاهلون من يخاف عليهم. روابي البناي