هذه القصة العجيبة والغريبة التي اعجبتني وسوف انقلها لكم ، لعل هناك من بستفيد منها ، وتكون له عظة وعبرة، هذه القصة عن الأخوة فهي لاتقدر بثمن، الاخ والاخت هما طعم الحياة ولذتها بعد وفاة الوالدين، ترى فيهما ابوك وامك وكأنهما على قيد الحياة، هيا معي الى هذه الاحداث والصراع حتى نهاية القصة وسوف ترون العبر . كان هناك اثنين من الاخوان حاقدين على بعضهم منذ ولادتهم ، ممكن بسبب او بدون سبب ، كانت الوالدة رحمها الله تقول يا عيالي انتم اخوان مالكم غير بعض، و مهما وقفوا معاكم الناس هم ناس يا عيالي. و الوالد رحمه الله كان دائما زعلان علينا ما يكلمنا و كلامه معنا رسمي جدا.. و السبب عداوتي انا و اخوي وكان دائما يقول للوالده الله يهديهم.. وراح يجي اليوم الذي يعرفون فيه قيمة بعضهم و يتذكرون كلامنا؛ ان الاخ مايتعوض. و لو تألم الواحد فيهم قال اخ ما قال صاحبي او صديقي. و تزوجنا انا و اخوي و زادت عداوتنا حتى زوجاتنا يوم يجتمعوا في بيت ابوي تصير مشاكل امي و ابوي احتاروا معنا كثير و يخافون يوقفوا مع احد يزعل الثاني و استمرينا على هذه الحالة. ماتت امي و بعدها ابوي بخمسة سنين و بعنا املاك ابوي و كل واحد فينا اخذ حقه و ماعاد احد فينا يدري عن الاخر، كبروا عيالنا و لو يتقابلوا والله ما أحد يعرف الثاني. و في يوم من الايام و هنا الطامة الكبرى دخلت في الاسهم و خسرت كل اللي وراي و قدامي و حالتي صارت تصعب على الكافر… مرضت بمرض السكري و مع الضغوط اصابتني جلطة افقدتني عيني اليمين من كثر التفكير في حالي و في عيالي لأني ضيعت كل شي في لحظة طمع. و في يوم و انا اصلي الفجر بكيت و دعيت ربي و قلت يارب ارحم امي و ابوي و ارحم ضعفي و قلة حيلتي و عوضني خير في عيالي، وفجأة.. شفت صديق لي قديم كان جارنا و حنا صغار سلم علي و عرف عني كل شي و بعد اسبوع زارني في بيتي وقال ابي منك طلب قل تم قلت ابشر….. قال هذا شيك بمبلغ و قدره ٥٠٠٠٠٠ الف ريال(نصف مليون) ابدأ به حياتك من اول و جديد و يوم ربي يفرجها عليك اعتبرها دين. سويت لي منها مشروع صغير و الحمدلله ربي عوضني كل اللي فقدته. و كل يوم اشكر الله الف مرة و في يوم اتفاجأت بصديقي يزورني و يقول لي؛ انا جيتك بأمر ضروري ما يحتمل تأجيل قلت له اذا على الفلوس ابشر يالغالي ترى الحمدلله ربك فرجها قال الامر اكبر بكثير قلت ما هي السالفه؟ قال ترى اللي اعطاك الفلوس اخوك وقال يا فلان اسألك بالله هذا سر بيني و بينك ما اقدر اشوف اخوي محتاج و اتركه في هذه الحالة. خذ هذا المبلغ و اعطيه لاخوي و لا يدري انه مني. و انا جيتك اليوم على شان تزور اخوك في المستشفى تراه بين الحياة والموت ، على الاقل روح تسامح انت و اخوك ترى اخوك يحبك. رحت اركض للمستشفى و دموعي تغسل كل كره السنين لاخوي ولد امي و ابوي دخلت غرفة الانعاش و شفت اخوي عليه اجهزة في كل جسمه مسكت يده و حبيت راسه و قلت سامحني فتح عيونه و طالعني والدمع ينزل من عيونه ، وضم يده ليدي و شهق انفاسه الاخيرة رحمه الله ،كل جمعه امر على قبره و ابكي و اتذكر كلام امي يا عيالي انتم اخوان، من وقف معي في شدتي الا اخوي روحه ما فارقت جسده الا عندما شافني. الاخ لا يعوض ..ابدا فاغتنم فرصة الحياة وسارع الى الصلح مع اخوانك واخواتك ، فالاعتذار شيمة الرجال ، والاعتراف بالخطأ لايفعله الا الشجاع، قبل يوم الحسرة.