صباح النشاط والسعادة وبداية أسبوع مميزة بكل ما تحلمه هذه الكلمة من معنى، عليكم، صباح أسبوع الطوارئ التعليمية اللى بدت من يوم الخميس مع بداية أول يوم امتحانات حق اعيالنا اللي ادعي ربي يسهل عليهم امورهم وينور بصيرتهم ويبشرونا بالنتائج السنعة اللي تسر القلب والخاطر وتخلي مخابي الأمهات والأبهات تقرقش علشان يشترون هدايا النجاح لعيالهم لأنهم يستاهلون، صباح الخير ياكويت ويا أهل الكويت سواء مواطنين ومقيمين لأن كلنا واحد. بما أن هالأيام هذي أيام امتحانات لطلبة المدارس والجامعات والكل ان شاء الله شاد حيله علشان اييب اليهده ويستانس ويونس أهله ويريحهم عقب الشقا واللبحه طول السنة، فحبيت اني اهذر معاكم اليوم عن الدور الكبير والمسؤولية الاكبر اللى ربي عطانا إياها ويبي يشوف احنا قد هالثقه وهالأمانه ولا إحنا مانستاهل هالنعمه. تكفون فتحوا الجهاز! الجهاز مغلق او خارج منطقة التغطية، جملة الكل والجميع يعرفها وحافظها لأنها مقرونة باليامعة اللي ما تنزل من ايدينا، واهو التلفون اللي من انبطل عيونه ونقول يالله صباح خير واهو بيدنا ليمن انسكرها ونقول تصبحون على خير واهو ما يطيح من راحة ايدنا، بس للأسف ان فيروس هالجملة التليفونية أصاب وايد منا، وقصدي من كلمة منا الكثير من الأبهات والأمهات، اللي على طول مو بس جهازهم امسكر لا والله وللأسف انهم اوصلوا لمرحلة حتى مخهم وقلبهم واحساسهم كله تسكر وصار خارج نطاق التغطية اللي مايفيد معاه طبيب ولا مداوي. ايه نعم، وانا أدرى انكم تدرون وتعايشون بعض من هالأبهات والأمهات اللي حسبالهم ان الزواج والعيال بس طقطقه وهب السعد وشهر عسل بالمالديف علشان يصورون، وفلان وعلان يعلق على الصورة وعقب ياحليلها فلانه حامل وعقبها بجم شهر وي ما رحتوا استقبال فلانه اللي وزعت فيه اقفاش Versace وصحون hermes، بس وعقب هالفلانه أم صحن وقفشه ما تدرى عن هوى هالسرو اللي يابته لأنه أمه ميري وأبوه كومار طال عمرهم اهم اللي حايفينه حوف لأنها اسم الله عليها ما عندها وقت حقه اهي ولبها تفتر مع ربعها من المطعم الفلاني ليمن المعرض الفلنتانى ومن عياده ليمن عياده علشان تتفخ الشفه اللي تحت وتكنتر البرطم اللي فوق واتكربن الخد اللي على اليسار وتفلتر الخد اللي على اليمين، هذا غير الخلق اللي اموت واعرف من وين اييبونه علشان يلوصون اويوهم هاللوص من صباح الله خير، وهالعدسات اللي اتسويهم مثل القطاوه الشيرازية وتنفش الكشيش والبف المرتفع اللي يسوي الويه طوالي كأنه صمونة فلافل كنارى المتروسة سلطه وطحينة، وتلوت الراس بالخرجه قصدى الجاب القطن المخرم والمتروس عن بكرة ابيه فصوص تلمع وتبرق على قولة صلاح حمد خليفة «يبرق الويل لايح». اما عاد عنتر زمانه اسم الله عليه، حدث ولا حرج ما يهيع دقيقه بالبيت يا بالدوام وعقبه يعجل بالنادي ليمن يطق ميخه واهو يشيل بهالحديد ويلط بالحبوب ويقز بهالأبر اللي كل مالها تنفشه وتفرشه علشان يصير مثل vin diesel يالله من فضلك، وعقب هدة حيل النادي يتزكرت ويقلقص روحه بالبلوزة اللاصقة الباسجة اللي اتبين عضلاته ويروح يرتز مثل المبخر بالقهوة اللي سابقينه ربعه فيها يحجزون موقع استراتيجي ديناميكي جهنمي علشان عيونهم اللي مثل رقاص الساعة ترصد واتسجل الداش والطالع ومنو هذي وشنو هذيج، وما يفوتهم شيء ويصيرون «IN» =، وما يخسرون السبق بالنشر بالعم سناب وعايلته الكريمة انستجرام وتويتر، هذا غير انكم خابزين وعاينين بعض ربعنا اسم الله عليهم اللي مثل القطاوة اللي طاقينهم بمصير مالهم جبد على التبحلق والتبوسم والتميلح كأنهم مراهقين. وبالبيت ميري وكومار يعابلون بالسرو اللي أم برطم وأبو زند قاطينه ومايدرون عن هوى داره. الصراحه ماني عارفة شنو السر والحكمة بالموضوع انهم يسطرون بهاليهاهيل وعقب يقططونهم على ميري وربعها اتدبخ واتربي واتوكل واتشرب واتدرس بعد هالأيام، إذا كانت هالميري مصنفة سبع نجوم ومعاشها على قولة مرام «بالعلالي ياقمر لا تلالي». ترا كلش مو عيب! أدري إني ما يبت شي يديد ولا قلت شي واو على قولتهم، بس اللي أبي أقوله وأبي أقعد فيه هالنوعية من الأبهات والأمهات من نومة أهل الكهف اللي نايمينها واللي ان شاء الله يصحون منها قبل لا يطيح الفاس بالراس، ويعرفون ان الله حق وان عندهم نعمة وايد غيرهم يغبطونهم عليها، ترا كلش مو عيب وكلش ما فات الفوت، ندرى انكم صار لكم دهر ما تدرون عن عيالكم، وندرى انكم أصلا ماتدرون إذا هالأيام في امتحانات ولا لأ؟ وندري انكم ما تدرون عيالكم بأي مرحلة دراسية ولا متى بيبدون امتحاناتهم ولا متى يخصلون لأنهم تاركين الجمل بما حمل حق العمود الفقري للبيت «ميري والحبيب كومار»، بس ماعليه مثل ما قلت لكم كلش مو عيب انكم تبدون الحين تفتحون جهازكم العقلي والقلبي واتخلونه يدش نطاق التغطية لو حتى ساعة باليوم تقعدون فيها مع اعيالكم بهالأيام اللي يحتاجونكم فيها اكثر من أي وقت ثاني، عفية فتحوا جهازكم حقهم وسكروا عن ربعكم وخرابيطكم صدقوني ان هالتغطية اللي راح تعطونهم اياها راح اتييب نتيجة ما تتخيلونها، عفية عتقوا ميري وكومار هالأيام وخلوهم ياخذون راحة واستجمام انتوا جابلوا عيالكم انتوا فتحوا كتبهم انتوا سألوهم انتوا قعدوهم الصبح ودوهم المدارس انتوا اخذوهم من المدرسة وروحوا معاهم عند الهندي اكلوا جباتي وجبن قلاص وسمبوسة مع فيمتو بارد صدقوني والله العظيم راح اتحسون بشيء وايد حلو ووايد ناطع احلى وانطع والذ من الفرابتشينو والموكا اللي اتلطونها مع ربعكم. والله العظيم كلش موعيب انكم اتردون حق عشكم وتبركون على فريخاتكم اللي وايد ولهانين عليكم ومحتاجينكم صدقوني راح تشعرون بشعور وايد حلو ووايد انتوا محتاجينه اكثر من اعيالكم.     آخر الكلام:   أحب أبارك مقدما لكل اعيالنا الناجحين واقول لهم الله يعطيكم العافية وشكرا من القلب حق كل ابو وام اصفطوا عمرهم وجابلوا عيالهم، شكرا من القلب لكل معلم ومعلمة اتعبوا وعطوا من قلبهم ووقتهم، شكرا لعيالي وعيالكم على مجهودهم وتعبهم وربي ان شاء الله ما يضيع تعب احد وكل عام دراسي وانتم بألف خير إن شاء الله، بغيب عنكم الفترة القادمه، والتقى معاكم بالشهر الفضيل عسا الله يبلغنا وياكم اياه بالخير والصحة والعافيه على خير بشي يديد إن شاء الله يعجبكم. روابي البناي