روابي البناي| صباح الحب في أسبوع الحب على اهل الحب، صباح المصالحة مع النفس، صباح تبادل الحب والبسمات، صباح الحب للجميع مسلم ومسيحي، سني وشيعي، بدوي وحضري، صباح حقكم كلكم دون استثناء.بعد ثلاثة ايام من اليوم، وتحديدا يوم الأربعاء الموافق 14 فبراير، راح يهل علينا واهو حاط ايدياته على قلبه من الخوف، يوم الحب مثل ما يحبون يسمونه ربع داعش، وvalentine day ربع الماك جكنواليولو، وعيد الحب ربع العصير الملون على قولتهم.. طبعا هذا ايينه كل سنه واهو يجدم نص خطوه ويرجع عشرين، لأنه مثل ما قلت لكم ماله خلق ازعاج ودندره زايده ولغوه وهذره مالها داعي، وملينا سماعها كل سنة مثل هالوقت من اعداء الفرح والحب ومحبي الهم والغم اللي ياكثرهم عندنا، واللي انا متأكدة انهم ما عاشوا الحب بحياتهم ولا حسوه ولا عطوا نفسهم نعمة الاحساس بهذا الشعور الجميل العذب، اللي تحتاجه كل نفس طبيعية لأنه يعتبر  مصدر السعادة للروح.أنا عن نفسي وحدة ما اقدر أعيش من غير حب، وايد عندي شي ضروري اني احب وانحب، وأعيش بحب مع كل من حولي حتى اللي الله يهداني وياهم يكرهوني، احبهم لأني متأكدة ان اللي يكره شخص لا يكرهه لشخصه بل يكرهه بنقص فيه هو شخصيا، او نجاح يشوفه باللي يكرهه وما يقدر يوصل له علشان جذي انا احب اللي يكرهني واخذ فيهم ويه الله.وبما أنكم صرتوا وايد جزء مهم من عالمي اللي بدا معاكم من 2008 ومستمر ان شاء الله، قررت أن تكون هذرتي اليوم مغبطة حب وسعادة وتفاؤل، بس قبل أن أستهل أحب أن أقول لجحافل الأمر بالمعروف والنهي عن المنكر، الذين نصبوا أنفسهم أوصياء علينا، والذين يحاولون تعكير صفو الحب علينا في هذا اليوم، أقول لهم جزاكم الله خيرا خلوا صراخكم وفتاويكم لكم، ترا والله العظيم انعرف الصح من الغلط، وترا سالفة ان الاحتفال بهذا اليوم حرام، وان اي واحد يحاول أن يبين أي علامة من علامات الحب والسعادة بهذا اليوم ويشارك اللي يحبه ويقدم له ورده او دب أحمر سيكون مثواه النار وبئس المصير، ترا صارت سالفة وايد ماصخه وباسجة، انصحكم من قلبي المحب لكم انكم اتدورون غيرها علشان الناس ما تكشفكم، هذا غير ان انتو مالكم اي حق انكم اتجرمون أفعالنا وتكفروها وتحللون أجسادنا وتبيحون تفحمها بالنار، فلله الحمد والمنة ان ديننا الإسلامي دين محبة وسلام وتعايش مع الجميع، لأن الله سبحانه وتعالى من صفاته الرحمة، وهذا ما جبلنا عليه وتعلمناه في حياتنا ودراستنا، ومن قراءتنا لسيرة المصطفى عليه أفضل الصلاة والسلام وأصحابه وآل بيته الأطهار، واللي اتبين  تسامحهم وحبهم للناس أجمع من دون الالتفات الى المظاهر والمذاهب والعروق، كحالنا التعيس اليوم، اللي نعيش فيه عصر الترهيب والتخويف تحت مسمى الدين.ياويلكم إذا قربتوا منه اوصلتني رسالة بالعم واتس اب، وياكثر رسايله اللي ما تخلص واللي جذبها اكثر من صجها، ان بعض جحافل الأمر بالمعروف والنهي عن المنكر امهات اويوه ودره، اللي الابتسامة تعتبر عدوهم اللدود، يهددون ويتوعدون اصحاب المحلات اللي يبيعون مخاد ودبب حمر، إذا شافوا احد يبيع ولا يعرض مثل هالمنكرات ما يلوم إلا نفسه، الصراحه شي يضحك.. انتو منو؟ انتو شكو؟ انتو منو عطاكم الحق انكم اتصيرون ولاة علينا؟ترا بس، صج بس، الظاهر احنا عطيناكم وايد فوق حجمكم، شنو يعني اتحرمون وتحللون على كيفكم؟فبعض من أطلق لحيته وقصر دشداشته، على اساس انه وايد مقتدي برسولنا الكريم عليه الصلاة والسلام، وبعض من لبس  البشت والعمامة واعتلى منبر الحسينية ليش يقتدي بالحسين عليه السلام بكل شيء؟ ترا كان عليه السلام يحب الناس كلهم دون تفريق بين مسيحي ومسلم، شيعي وسني.ليش ما تتعلمون اشلون كان الرسول واهل بيته يعاملون الناس وزوجاتهم وكل من يعنيهم؟ ولا دريتوا ان اللحية والدشداشه القصيرة والعمامه والبشت اهي «دقة السلف» حق طريج التكسب والتمصلح بالدين؟فبدال لا تقعدون تتوعدون وتهددون وتخرعون خلق الله جان زين تقولون لي شنو اهو الجرم اللي راح يقع لما فيروس الرومانسية الإيطالية- الفرنسية- الأميركية تعدى العنتر الكويتي ويقدم ورده حمره حق الإنسانه اللي يحبها وتعني له شي بهاليوم ؟شنو الجرم اللي راح يصير لو نزل سهم الله على الريال الكويتي وصار، يالله من فضلك، رومانسي اكثر من سليمان القانوني وفاجأ نصه الثاني بهاليوم بمفاجأة يعبر فيها انها شي وايد مهم بحياته انتو شلي حاركم وباط مرارتكم؟ترا والله مكشوفين!بس حبيت اقول لكم من باب بلغ تؤجر، ان لعبكم باستعطاف الناس على الوتر الديني، انصحكم انكم اتسوون renew حق فريق اللي يحركونكم علشان تتلاحقون على عماركم وماتصيرون في خبر كان، لأن احنا ما ننطر نصيحة منكم، وعلاقتنا بربنا هذا شي خاص ما نسمح لأي كان التدخل فيه، تدرون ليش؟ لأن إيمانا بالله وبرسوله وبأهل بيته الأطهار نابع من قناعة وحب متبادل وليس من مصالح ومكاسب ومطامع، لذلك راح نحتفل بالأربعاء الأحمر، وراح نشتري ورد ونحب وننحب لأن احنا على ثقة وإيمان تام بتعاليم وسماحة دينا الحنيف اللي اساسه الحب.حكومة الفالنتاين جان زين يصدر قرار اسرع من السريع من مجلس الوزراء يتم الإعلان فيه تعطيل الدوائر الحكومية، باستثناء الدوائر اللي يتطلب فيها استمرارية العمل للمصلحة العامة يوم الأربعاء الموافق 14 فبراير، علشان حكومتنا الرشيدهة اتأكد لنا انها حكومة حب وتحب الحب، وطبعا حكومة اتقدر الحب اهي حكومة تستحق البقاء والاستمرار وكل الثقة، وتعطينا امل بالغد المشرق اللي صار لنا ننطره وما يندرى متى يهل علينا نوره.طلبات دوت نت!بما اني وحده منكم وفيكم، وان شاء الله امون عليكم عندي جم طلب ودي اطلبه منكم..– اول طلب وايد بسيط وطالع من اعمق مكان بقلبي حقكم انتو ياللي قاعدين الحين تقرون هذرتي، عفية ابتسموا بويه حبايبكم وربعكم، عفية سامحوا، تغاضوا، انسوا، عفية ان كانت هناك أي عثرة اعترت طريق علاقاتكم الإنسانية فهذي دعوة مني اليوم علشان تنسونها وتبدون خطوه يديده امغبطه حب.– ثاني طلب اتمنى من اخواني الرياييل واللي ان شاء الله ان امبير الرومانسية اليوم يكون وايد مرتفع ووايد راح يعبرون ويقولون عفية ترا كلش ما راح ينقص من رجولتك شي لو انك اتخطط من اليوم شنو راح اتسوي حق زوجتك ولا حبيبتك ولا امك ولا اختك بيوم الحب، وحق الرياييل من فئة الجلافة دوت كوم اقول: تعبث بالعم غوغل وطلعلك جم كلمة قولها حق الفقيره اللي اتطالع ويهك غضبان ولا راضي، ترا والله العظيم راح يكون مفعولها سريع وعجيب اقوى من مفعول الكمام بالولادة.– ثالث طلب حق كل زوجه وام واخت وحبيبه، اتمنى انج تفضين نفسج بهاليوم وتهيعين بالبيت وتسكرين تلفونج وما تبققين عيونج بالانستغرام وسناب وربعهم، وتتخلين عن طلعة الحش والتطنز مع رفيجاتج علشان لا يفوتكم شي، وتتكشخين مثل كشختج حق طلعتج وعروسج واستقبالاتج، وتوخرين عن التقلدم والتحلطم، وتجهزين مفاجأة حلوة حق الحبيب الغالي مع بعض الكلام الحلو اللي يرد الروح.فتكفون تكفون، وهمن تكفون لا تقصرون بالحب، ادري انكم طول السنة تحبون بعض وتموتون على بعض، بس بهاليوم ابي تزيدون الجيلة شوي وتصيرون السلطان سليمان وهيام لأنهم مو احسن منكم.نحو حب من غير هلاقة دوت كوم! ادري ان وايد بنات وشباب بهاليوم ما ينطرون احد يوصيهم، وراح اييبون اليهده بالكشخة الفالنتانية، ويتحفونا بآخر ما توصلت له خطوط الموضة الحمراء، بس الله يخليكم شوي شوىي علينا ترا مالنا جبد على كشختكم الفالنتانية، ادري انكم تنطرون هاليوم من سنة لي سنة، وادري تبون اطلعون الكبت اللي فيكم، بس همن احنا ما لنا ذنب، علشان جذي بطلبكم واترجاكم رجاء حار جدا جدا جدا ، تكفون مانبي نشوف عبي مخصرة واحجابات حمر وخزامات تلمع بالخشم وحمرة حمرة، ومانبي نشوف «توب» Top احمر مرسوم عليه قلوب حب ترتر وتاج يرتهش على الراس من الفصوص الحمر اللي فيه، وتكفون مانبي نشوف البوز الممدود والمصاصات اللي على قلب حب بالحلوج المنتفخة وتفترون على شارع الحب والخليج وتحطون اغنية «مجنوني» على اساس انكم متحطمين ومؤشر الحب واصل حده عندكم، تكفون ما نبي نشوف ضحايا ومآسي عقب ما تقطون ما وراكم ودونكم من معاش واعانة الجامعة وسلف، هذا غير القرض بس علشان تشترون هدية الفالنتاين حق قيس بن الملوح، اللي اخر شئي يقولج ما اقدر اخذج امي مريضة وتبيني اخذ بنت خالتي، تكفون مانبي نشوف منظر الشباب اللي يلبسون بلوزة حمرة مخصرة بس علشان يبين عضلات صدره ويطلع زنده اللي صار له شهرين واهو يلط بهالفيتامينات ويدق ابر بس علشان يصير بطل الفالنتاين.