صبحكم الله بالخير يا شعب حكومته مستاءة من معدلات الفساد، صبحكم الله بالخير يا شعب ماشي على البركة والله حافظه وساترها معاه لأنه نيته طيبة، طبعا مو الكل بس الأغلبيه ولله الحمد، المهم صباحكم خير وبداية اسبوع امزكرته ما فيها ان شاء الله ريحة الفساد ولا المفسدين. اليوم الله يسلمكم بهذر معاكم عن اخر ما توصلته التقاليع والفناتق الكويتية اللي كل مالها اتيبنا ارض ارض بدل ما ترفعنا جو جو، اليوم بهذر عن يمعات «المراحيم» رحمة الله عليهم اللي صايره هبه عندنا بالكويت، فإحنا يالله من فضلك من كثر ما نحب المواجيب ومن كثر ما السنع والمنع ناط من عيونه وطافح طفوح عندنا حتى اللي يموتون وربي ياخذ امانتهم ما انعتقهم ولا انخليهم يتوسدون يمناهم بسلام وأمان، بتقولون شلون؟ انا اقول لكم.. الله يرحمه كان وايد خوش! أنا ادري انه احنا اسم الله علينا محد يقايشنا بكل شي يديد ونعطي الأكو والماكو مليون صفر بالشحاطة والزمط، بس مخي ومخيخي ونافوخي كلش ملش ما خطر على بالهم ان الشحاطة توصل فينا الى حد التفلسف بالعزا وشلون اييب اليهده علشان يصير عزانا احسن من عزا بيت فلان؟ الصراحه هذي يديده علي وللحين ماني قادره اصحى واتنفس الصعداء منكم ومن فعايلكم ياشعب مادري لي متى بيكشخ غلط؟ قبل اسبوع رحت اسوي الواجب واقدم العزا حق ناس اياويد مثلكم وشرواكم متوفى ابوهم، الله يرحمه ويرحم جميع موتانا وموتاكم ويجعل مثواهم الفردوس الأعلى امين يارب العالمين، المهم، وصلت بيت المرحوم اللي توه متوسدة يمناه قبره وتوه انفاسه بالمكان ما راحت، اول ما دشيت ياني شعور اني داشة القاعة الماسية، وبعد شوي بوسليمان القصار بيصقل طاره وراي وبيعطيني ما عطاني زماني من سامرياته السنعه، ويقول تيه افكاري غزال ياعلى شفته شمال، ولا غاب بدري انا يا من يجيبه، بتقولون لي ليش ياج هالإحساس روابي؟ أنا اقول لكم ليش ياني، ياني من البرقه اللي اكسرت عيني وانا اسلم واللي يايه من التراجي والساعات والخواتم والأساور اللي متشكشكين فيها اللي يايين يعزون، ياني من ريحة السبراي اللي تارسه المكان واللي اكفخت خشمي وخلته يتبطل طبعا لزوم البف والـponytail، ياني من الويوه المليوصه، ياني من كمية الحش والقراظ والمساسر والتنقز اللي بين المعزيات حفظهن الله، خاصة اذا دشت وحده ما يواطنونها ولا توها امعرسه ولا توها امسويه عزيمه وما لقتهم ويه ولا طلعت بيوهم وقالت لهم تفضلوا، ياني من كمية الملوفح والتبوسم حق شاشات التلفونات والتصوير السيلفي، ياني من الأسئلة التافهة اللي انسألتها واللي لا مكانها ولا زمانها بس اللي اسألوها الحياة جدا بمبي على قولة ابناء النيل العظيم، وما عندهم اي مشاكل باختيار الوقت ولا المكان المهم يسألون ويبلغون شفهم. شنهو اليديد؟ ادرى بتقولون روابي وشنهو اليديد بالموضوع؟، هالمناظر من عمر الدنيا موجوده، ليش خابه عمرج وخابتنا معاج؟ والله العظيم ادري ان هالمناظر موجوده ويمكن ازيد، وادري بعد ان مكاين البوس بعد متواجدات وبقوه وحق اللي ما يعرف شنهو مكاين البوس اهم بعض الحريم الله يهداني وياهم «المبواسات» وبمعنى اصح يعني يقدرون «التبوس والتمطخ» فتلقاهم يدخلون العزاء ويطيحون له بوس بالأكو والماكو، والوحدة منهم تاخذ صالة العزاء طول بعرض مغير اتمطخ باللي جدامها على اساس انها وايد زعلانه على المرحوم، بس المشكلة مو بالبوس المشكلة بالأشياء اللي يخلفها هذا البوس من سعابيل، عزكم الله، خاصة إذا كانت هذه المبواسه (ثرمة) فتلقى خدود الحريم اللي انباسوا (تلق) عقب تمطخ وتبوس هالثرمه الله يهداها. وأدري ان مندوبات «كونا» و«رويترز» متواجدين بكل عزا، واللي من اول ما تقبل ليمن تقفى ماسكرت حلجها من الهذره الزايدة والقرقه الماصخة اللي مالها داعي، فتلقاها اتسلم على اللي تعرفها واللي ما تعرفها، وما عندها غير دريتوا فلانه تطلقت؟ وماسمعتوا انه علنتانه تزوجت؟ وسمعتوا ان ام فلان ريلها تزوج عليها وغيرها من الهذره السخيفه، هذا غير لصقة عنزروت اللي تلصقها الحبيبه والنشبه اللي تنشبها اذا كانت تبي تبلغ شفها وتعرف سالفة معينة، او تتاكد من خبر معين فتلقاها تفج حلجها وتبدى اتهذر، ادري ان كل هذا انتو تعودتوا اتشوفونه بالعزا وتأقلمتوا عليه، بس قلت ارد اقوله من باب ان الذكرى تنفع المؤمنين جود الله ورحمته يحسون هالنماين ويخفون من اللي قاعدين يسوونه. كوكيز رحمة الله عليه! اليديد بالموضوع واللي للأمانه ما شفته بعيني بس انقلوها لي وصوروها لي، ان العزا الحين صار «يمعة المرحوم TIME» يعني الوضع صار من عزا ينقرا فيه جم يزو من القرآن ويدعون حق اللي تغانى عن الدنيا وراح حق ربه ويطلبون له الرحمة الى يمعة سوالف وحش وقراظ!!، واللي خلاني اقول جذي الهبه اليديده اللي هابين فيها بيمعات المراحيم واللي اهي الكوكيز والبسكوت المكتوب عليه اسم المرحوم، وعبارة «انا لله وانا اليه راجعون»، هذا غير اللي عاد يبون يكونون الـ HIT بالسناب وربعه فتلقاهم اييبون STATION من قهوه معروفه علشان يقدم المشاريب حق المعزيات يعني فرابتشينو وكابتشينو وموكاتشينو وربعهم، بس علشان لا نظلمهم ماكو عليهم كريمه على اساس انهم زعلانين على المرحوم، وما هي عدله انهم يقدمون الفرابتشينو مع الكريمه البيضه اللي اتبين انهم مو زعلانين على اللي راح. يعني انا مادري شسوي بعمري ولا ادري شقول، انتو من صجكم؟ وين تبون اتودونا؟ وين تبون توصلون؟ حتى الموت ما سلم منكم؟ ولا من شحاطتكم وزمطكم؟ حتى العزا حولتوه من عظم الله اجركم الى يمعة الله يرحمه؟ يعني انا متأكده ان مو قاصر عليكم يمعات ولا عزايم ولا طلعات علشان تتشيحطون فيها وتبينون شنهو اللي عندكم وشنهو اللي ما عندكم، بس ما ادري شنهي القمنده ولا شنهي الحكمه من هبتكم بيمعات رحمة الله عليه هالأيام؟ الصراحة ما استبعد عقب جم يوم اروح اعزي القى الفوندو وربعه ناطريني، وعقبه ورق العنب والملفوف الصغيرات المجكنمات امهات عواده يفترون علينا، بس ها ما اوصيكم حطوا بالكم لا تحطون لا فراوله ولا موز ولا كيوي مع الفوندو علشان الناس لا تاكل اويوهكم لأنكم حاطين فاكهه املونه، حطوا فوندو مع كوكيز فيه قمح علشان اسمر وحطوا فاكهة امجففة منها انكم اتراعون صحة معازيمكم ومنها الوانها قاتمه. ماقول غير الله يهداكم ويصلحكم ويطخخكم ويوخر وشة العقل اللي اتييكم من تسمعون اكو شي يديد ولا ان فلانه سوت شي يديد، وان شاء الله ربي ما يعاجبنا ولا يحاسبنا بفعايل البعض منكم، لأن احنا بروحنا على طريف نبي الستر والرضا من الله هالدور فوندو وفرابتشينو بالعزا؟ روابي البناي