ياهلا ومرحبا ومسهلا بالغالين، كل سنة وانتو بخير وصحة وعافية، ما عليه ادري متأخرة بس يالله طوفوها لي وتقبلوها مني، ان شاء الله 2018 تكون وايد أسنع وأبرك وأجمل وألطف وأرق علينا من اختها 2017 اللي راحت الحمد لله بحلوها ومرها وجلافتها وطناقيرها وزيرانها وكل ما فيها. بما ان هذي اول هذره لي في السنة السنعة الجميلة 2018 حبيت انها تكون غير اشوي، يعني اتكون عباره عن هذره تغييرية مثل ما يقولون، هذره تصحيحية انعدل فيها كل شي عوي كان غاثنا وذابل جبودنا وفاقع مرارتنا في 2017 ولزوم ندحره ونفتك منه.. عفواً بس.. مو شكراً! خلونا مع بداية هالسنه الحلوه المملوحه كلنا مع بعض نقول عفوا بس من غير شكرا ولا ميرسي ولا متشكرين ولا Thank you حق كل شي كان معانا في 2017 وما يهم شلون كان معانا، ولا شلون قدر انه يسيطر علينا ولا شلون احنا صرنا تابعه قفه حقه، المهم ان احنا في 2018 نقول حق هالشي عفوا والقلب داعيلك روح شوف لك ناس ثانية غيرنا، احنا مشغولين بوايد اشياء اهم هالسنة. احتمال جدا وارد ان وايد منكم الحين واهم يتقرون هالصفحة سواء بالمتجددة المتطورة الأنيقة- القبس الالكترونية-، او بعتيج الصوف ولا يديد البريسم- واقصد القبس الورقي- اللي انا اموت عليها، وما راح يبدى يتحلطم ويترقطم ويقول ياحليلج ياروابي وايد شاده حيلج مع بداية السنة، ووايد امبير التفاؤل عالي عندج احنا نبي نقرى هذرتج بعد اربعة اشهر من الحين ونشوف هالروح راح تظل معاج ولا لأ؟ كلامكم مليون بالزيليون صحيح، لأن ادري ان الوضع بوطن النهار للأسف صار له اسنين وابنين هذا سيفوه وهذي خلاجينه، ماكو شي تغير، ولا كوشي عطاني ريحة التغيير، وكل شي على طمام المرحوم.. بس انا اليوم ما ابي اهذر عن وطن النهار والخمال اللي فيه، انا ابي اهذر عنا احنا شعب وطن النهار، اعيال وطن النهار، حريم وطن النهار، رياييل وطن النهار، يهال وطن النهار، اللي اقولها بكل اسف وحسره ان احنا فقدنا هويتنا، فقدنا طبيعتنا، فقدنا احنا منو، وكل هذا بسبة العرف الدخيل علينا واللي ما تعودنا عليه ولا اهو سلكنا ولا سلك اهلنا واللي يقول ان كل شي عادي. عيل شنهو اللي مو كلش عادي؟ الشيء اللي خلاني اصر ان تكون هالجزئية موضوع اول هذرة لي معاكم بالسنة اليديدة، ذبلة الجبد والغثا اللي حايشنا كلنا من تصرفات بعض بنات وشباب وطن النهار، واللي اقولها بكل صراحة خلانا نستحي نقول ان هالنماين اللي انفرضوا علينا فرض كويتيين، وانهم للأسف يشيلون السوده المربعه المزكرته بالذهبي، فقلت خل اتكلم وخل اقول جود الله ورحمته قرصة الإذن اللي راح تييهم عقب هالهذره اتفيد واتييب نتيجة، هذا غير امنيتي اللي ان شاء الله تتحقق بهالسنة اني القى اجابه شافيه ووافيه للإجابة الجماعية الموحدة اللي متفقين عليها وايد من ابناء وطني الغالي، لما اعيوني اتصير بقمة راسي من الهول اللي اشوفه او اسمعه واقول انتو من صجكم اشلون جذي؟ ولا اشلون جذاك؟ تييني الإجابة تتدربح على البراد اشفيج روابي عادي. فرجاء حار جدا توه طالع من تنور الخباز وعليه سمسم بعد، عفيه خل اتعدي 2018 علينا من غير كلمة «ترا عادي»، لأن بهالعادي صرنا ضحكة سخيفة حق اللي يسوى واللي ما يسوى. يمكن الحين بتقولون اشتبينا انسوي ولا اشلون يا فهيمة زمانج انصير مو عادي وانبطل من العادي مالنا؟ انا اقول لكم.. – لما توقفون وقفة عدله سنعه بويه كل من يحاول يخليكم نكته سخيفه بحلج اللي يسوى واللي ما يسوى ولا يحاول يخليكم مسلسل فكاهي هابط ببثه الإشاعات او بتأجيجه الطائفية والقبلية، وغيرها من الأمور اللي اتييب القامت وانتو بكل سذاجه تصدقونه وتمشون وراه وانتو امغمضين بدون تفكير ولا تدبير اتصيرون عادي. – لما اتوخرون من متابعة المترديه والنطيحه اللي يلمهم عالم السوشيال ميديا واللي كل دقيقة والثانية طالعين لنا بهبة وفنتق يديد دخيل علينا وعلى عرفنا وتربيتنا اتصيرون عادي. – لما اتبطلون تعطون حشرات السوشيال ميديا فوق حجمهم وتبطلون اتقلدونهم بتصرفاتهم وطريقة عيشتهم اللي اهي اصلا موصج وكلها تمثيل بتمثيل اتصيرون عادي. – لما ربي يفكنا من بلاعين البيزه، سواء حريم او رياييل، اللي انفرضوا علينا فرض ودشوا دهاليز حياتنا غصبن علينا موبكيفنا وقاموا يفتون ويعطون دروس ومواعظ، واهم لو بتدش بيوتهم راح تنصدم من كمية لوعة الجبد اللي اهم فيها اتصيرون عادي وعادي جدا بعد. – لما نستنكر قعدة بنات ما يتعدى عمرهم 17 سنة بقهاوي بين الرياييل، -على قولة اخوانه المصريين- وهوز الشيشه بحلجها المتفوخ اتصيرون عادي. – لما تختفي ظاهرة سمسرة الملابس الفاضحة المتفشية بشكل مخيف ببعض المدارس والجامعات والمعاهد والدوامات علشان الفلوس والمظاهر والتقليد اتصيرون عادي. – لما تختفي علامات الدهشة والتعجب من ويوهنا لما نلقى عبود وسلوم وخلود اللي محسوبين علينا بالتركيبة السكانية رياييل مترصصين بالشورتات المقصملة والبلوزات الشفافة الضيجة وكاشحين اكشيشهم بالتيجان الملونه وامزبرين على الكراسي ويجربون كريمات الاساس والحمر بمحلات الماكياج اتصيرون عادي. – لما نوقف عند الإشارة وما يحوشنا عافور الدخان الأبيض من السياره اللي يمنا والمتروسه عن بكرة ابيها بنات بعمر الورد ماسكين الشيشه والزقاره الالكترونيه وينفخون بكل اريحيه، هذا غير طقة العلج البصري اللي يسمعها اللي نايم يشخر في بيتهم بس داره تطل على الشارع من زود الضمير اللي ينفخون فيه، هذا غير تكسر الرقبه وهزة الجتف على دنابك «اشلون اعلمك الحنية» اتصيرون عادي. – لما يرد لنا شعور الوناسه والشراحه اذا انعزمنا على يمعات الأهل والربع، ويوخر عنا شعور الحارج اللي ماله طب واللي يحوشنا من اول خمس دقايق بسبة الملاقه والزمط اللي يسلكونه بعض حديثات النعمة اللي توه راشهم النفط وصار عندهم بيزتين ومو عارفين شسوون بعمرهم اتصيرون عادي. – لما تتغير سياسة «من صادها عشّى اعياله» اللي ماشين عليها بعض قياديي ومتنفذي وطن النهار اتصيرون عادي. – لما يغير عكرمه وابو قتاده شعارهم اللي يقول «طول لحيتك علشان تترس كرشتك» اتصيرون عادي. – لما شهر 6 و7 و 8 ما نشوف بلندن وغيرها يهال حفاي بالبيجامات يتسبحون ببحيرة الهايد بارك حتى البط ما سلم منهم، ولا نشوف سيارات اتقحص واتنفخ على خلق الله من ربع سياحة حب الخشوم بالخارج اتصيرون عادي. – لما اتردون تكشخون صح وبالمعقول واتعرفون ان الله حق وتتركون عنكم الكشخه الغلط بكل شي اتصيرون عادي. – لما اتبطلون تاكلون الخس والزيتون بالشوكه والسجين، والسبة تقليدكم الأعمى للفاشيليستات اللي قبل لا اتابعونهم ويصير لهم شنة ورنة ابوها يطقها بنعال نيدية اتصيرون عادي. وايد عندي اشياء اتخلينا انرد عادي بس انا بطبيعتي مو طماعة اذا حققنا 5 من هالعادي اللي انا ذكرته الصراحه غدى شرنا وحمد لله على سلامتنا وخروجنا من الظلمات الى النور. آخر الكلام اتمنى من كل قلبي ان الهذره اليايه، او اللي وراها، اني اصحح عنوان هالهذره، واقول شعب اللي محد يقدر يضحك عليه ولا يقدر احد يأثر عليه ولا يقدر احد يخليه تابع له، عفيه راضيه تجعموني وتفشلوني وتخلوني اكتب.. عفيه سووها وغيروا روحكم وصيروا عادي ياشعب المو عادي.